Баһ Дөрвдә района селәдт Ижл һолын усн цаглань иржәнә
Баһ Дөрвдә района аһуд селәнә эдл-ахун кергт олзлх усна төр күцц хаһлһгдв. Тенд цуг насосн станцс көдлжәнә. Ода Калмелиоводхозин специалистнр Ижл һолас иржәх усна урсхл болн кемжәһинь бүрткж хәләжәнә. Эн туст мана танһч цаглань мөнг йилһж өгснәс иштә, эн төр ахр болзгт хаһлгдв.
Насосн станцс көдләд, Ижл һолын усн Баһ Дөрвдә района аһуд күрв. Калмелиоводхозин специалистнр болн көдләчнр цутхлнг магистральн нег участкд ик холас иржәх усна урсхлынь болн кемжәһинь бүрткж хәләжәнә. Бад Дөрвдә филиалын директор Баатр Бадмаевин келсәр, ус орулж авлһна цуг керг-үүлдврмүд темдглсн болзгт күцәгдв. Эннь бас учрта. Юнгад гихлә, Хальмг танһчин һардвр Октябрьск болн Баһ Дөрвдә райодыг усар тетклһнә төлә цаглань немр мөнг йовулв. Калммелиоводхозин Баһ Дөрвдә филиалын директор Баатр Бадмаевин келсәр, сентябрин арвн нәәмнд ус оурлв. Эн туст боомтг учрсн уга. Ик урдаснь бүрдәмжин болн мөнгнә төрмүд хаһлгдв. Ода усн Ханата болн Зурһан селәдт гүүлгжәнә. Дөрв-тав хонад энд усн орж ирх.
Цааранднь мана үүдәгч баг ус күләжәх селәдт һарч темцв. Маднла хамдан йовсн района толһач Геннадйи Золочевский келсәр, ода усн цувгар Ханатинск СМО-д күрв. Нааран ирнс хөөн, энүнә үг мел чик гиж бидн герчлвидн. Удл Ижлин усн хамгин хол бәәх Зурһан селәнд күрхмн. Ханатинск СМО-н ахлач Санһж Кононовин келсәр, мел иим цагла ус күләжәсн бәәж. Хәләтн усн мана селәнд ирәд, цаарандан һоожж йовна. Тегәд мана селәнә төр хаһлгдв гиж келх кергтә.
Ижл һолас цувгар иржәх усыг бәәрн селәдин әмтн селәнә эдл-ахун кергт олзлна. Эдн һаруд-садан услна, малдан ус өгнә. Ижл һолас ирнс усыг Ханата селән совхозин боодгт орулхмн. Зурһан селәнд болхла шишлнг кевәр белдсн бичкн боодгт орулх. Ижл һолас усн иржәхин тускар бәәрн селәдин әмтн йир сәәнәр мседнә. Жил болһн сентябрин дундурар иим усыг боодгт оурлж авна. Эн жил бас иим болзгт цаглань усн ирх. Манж Дордживеин келсәр, Ижл һолын усн йир сән дөн болжана. Малан услж болх, һаруд сад тәрж болна.
Дәкәд болхла һару эн жил баһрх зөвтә. Зунын кемд һан-халун болода невчк түрү болв. Усн ховр бола әмтн уудг ус эдл-ахун халхар олзлгдв. Уудг усна төрәр болхла энд боомтг бас болхш гиж бәәрн әмтн келнә. Худгуд болн сән чинртә уста булгуд сән нилчән күргжәнә. Тер саамд селәнә улсин асржах малын то жил ирвәс өсәд йовна.
Любовь Манджиеван келсәр, ода хөрн бод мал болн арвн хө асржана. Сардан нәәмн водовоз усн кергтә. Ижл һолын усн ирхлә, нег сард негн эс гиж хйор машин усн кергтә болх. Мана селәнә эздүдин гермүдт хөр һаа толһа мал бәәнә. Гем уга сән бәәнәвидн. Нег үлү, нааран әмтн хәүр нүүж иржәнә.
Бәәрн һардачнр цуг бәәдлиг чанһ бүртклһнд авсн бәәнә. Селәнә улсин төрмүдиг хамдан хаһлхар зүткнә. Ханата селәнд хойр усна булг шинрүлх шиидвр селәнә улсин хургт авгдв. Ода иим булгудас әмтн ус авчана. Дәкәд болхла ода Ханата селәнд шин техник ирв. Баһ Дөрвдә района администрацин толһач Геннадий Золочевский келсәр, иим селәдт талдан чигн ирлцнһү программ күцәгдх. Эн туст селәнә улст цуг таал бүрдәхәр района болн селәдин һардачнр зүткжәнә.
Эннь темдглсн зуран зуг нег әнгнь. РМО-н ахлачин тоолврар, цуг төрмүдиг чидлән негдүләд күцәх кергтә.
Чучян Валентина, Котина Валерий
