Лаганя бәәрн депутатрин дарани сессин сүүр болв
Усар улсиг тетклһнә, һазр олзлһна, медикүдт немр мөнг өглһнә болн заһс тенгст бәрлһнә аһу икдүлһнә төрмүдиг Лаганск района хургин элчнр хуралын депутатнрин хәләврт орулж өгв. Бәәрн депутатрин болсн сессин сүүрт эн төрмүд ода райодн хамгин хурц гиж тоолдгдв. Эдниг РМО-н сессьин көдлмшт орлцсн Хальмг танһчин олн-әмтнә хуралын ахлач Анатолий Козачко дөннв.
Усна, һазрин, эмчнрин жавлин өрин болн заһс бәрлһнә аһу икдүлһнә төрмүдиг Лаганя муниципальн бүрдәцин депутатнр хуралын депутатнрин оньгт тусхахар шиидв. Района ахлач Андрей Манджиевин болн бәәрн депутатнрин һардач Герман Бадма-Халгаевин келсәр, эн төрмүд ода Көк тенгсин көвәд бәәх района һол төрмүд болжана. Эдниг нааран ирсн Хальмг танһчин олн-әмтнә хуралын ахлач Анатолий Козачко дөннв. Улан Хол селәнә өөр бәәх һучн тавн дууна цувг тоссхин төлә кесг жил хооран зун дөрвн сай арслнг кергтә болв. Хойр жил болад цувг эврдх әәмшгтә. Тегәд ода энүг федеральн медлд орулад, ахр болзгт эдлврт орулх кергтә болжана. Эс гиж цуг көдлмшиг шинәс эклх кергтә болх. Нег үлү, иим көдлмш эс күцәхлә, лаганцнр усн уга үлдхмн. Дәкәд болхла, һазриг нәәмәдлһнд өгдг арһ уга болжана. Иим кевәр алвна кемжән өснә. Тегәд талдан халхар ору авх кергтә. Эн туст танһчин ирлцнһү ведомствс дөн болх зөвтә. Тер тоод Көк тенгсин усн баһрснас көлтә, заһс бәрлһнә аһуг тавн дуунда икдүлх төр тәвгджәнә. Медицинск көдләчнрт немр мөнг өглһнә төр болхла кесг жилдән хаһлгджахш. Лаганя цутхлнг района больницин ах эмч Герман Бадма-Халгаевин келсәр, танчин эрүл-менд харлһна министерствин һарһсн эндүһәс көлтә сүл хойр-һуврн жилмүдт медикүдт немр мөнгн өггдсн уга. Ода эн төр зарһд бәәнә.
Бюджетд мөнгн ховр болсн бийнь, района больницин төрлһнә әнгин герин ясвриг лаганцнр төгсәх саната. Тер мет балһсна хамгин хуучн школд капитальн ясвр кегдж, сурһулин шин жил күртл белн болв. Ода энд тавн зун көвүд-күүкд сурчана. Һучн зурһадгч жилд тосхгдсн школд нег чигн дәкж ясвр кегдәд уга бәәж. Эндәс дөчн хойрдгч жилд дәәнә цагт хальмгудыг киитн Сиврт нүүлһсмн.Тегәд ода лаганцрин санлд эн школ мөнкинд үлдхнь лавта. Лаганя негдгч школын директор Татьяна Соломенцован келсәр, иим төрмүдт ик ахлачнр оньг өгхлә, сән болна. Тегәд чигн хурц төрмүд ахр болзгт хаһлгдна.
Района депутатнр олн-әмтнә хуралын ахлачд кеж-күцәсн үүлдврмүдин тускар келж өгв. Анатолий Козачко эврәннь халхасн харһлтын аш диглв. Хальмг танһчин олн-әмтнә хуралын ахлач Анатолий Козачкон келсәр, өдгәц агт цуг йосн хоорндан ни-негн көдлж, селән улсин төрмүдиг чидлән негдүлж хаһлх кергтә болжана. Эннь өдгә цагин неквр болжана.
Районд тогтсн бәәдл-жирһлин бәәдл дор ормднь үзсн хуралын ахлач зәрм хурц төрмүдиг дор ормднь Элст балһснд жиннүләд хаһлв. Талдан төрмүдин тускар бийдән бичж авв. Эннь бас учрта, юнгад гихлә, района үүлдвр уралан йовхин төләд, танһчин парламентин дөн бас кергтә болжана. Хуралын депутатнр нөкд болхдан белн. Энүнә тускар Лаганьд болсн харһлтын йовудт кесг дәкж келгдв.
Хавтхна Элла, Очра Сергей
