Хальмгин коллектив лауреатын нер зүүв
“Этно-Эрато”. Иим нерәдлһтә ик модын евразийск түрүн марһан болв. Якутск балһснд келн-улсин хувц-хунрин янзар кегдсн зун хуранһу Грузин, Японя, Китдин, Казахстана болн талдан чигн һазрас авч иргдв. Тер тоод Хальмгин костюмин болн пластикин театр марһанд орлцад, лауреатын нер зүүв.
Иим марһанд орлцад, эврәннь келн-улсин сойлыг үзүлх арһ учрна. Хальмгин күүкдин үзүлсн хувц-хунр ке-сәәхн хатхмрар, олн-зүсн кеерүләр болн өвәрц эдәр йилһрв. Келхд, Хальмг танһчин коллектив нарта-делкән марһаст дару-дарунь орлцна. Давсн жилд эдн гран-при шүүж авсн билә. Эн саамд хальмгин баһчуд дөрд үзгин костюм нертә номинацд Алдр Торһн замар нертә хувцна хуранһу үзүләд, дөрвдгч орм эзлв. Делегацин һардач Татьяна Милованова шишлнг мөрәһәр — якутин үнтә эрднь чолуһар кеерүлсн алтн зүүһәр болн утцар мөрәлгдв. Онц темдглхд, иим үнтә мөрә мана элчд хуучн цага хувц-хунрар дамжулж келн-улсин уул авьяс зангшал хадһлсн төләд бәрүлж өггдв.
Хальмг танһчин сойлын ачта көдләч, костюмин болн пластикин театрин һардач Татьяна Милованован келсәр, хальмг танһчин сойлар олн күн соньмсв. Мана келн-улсин хувц-хунрар иим олн әмтн соньмсх гиж санжасн уга. Эннь өвәрц болв. Талдан келн-улсин хувц-хунр хәләһәд, бай байрлв. Теднә хатхмр, һарар кесн материалмуд сонбн болв. Тедн болхла хальмгин хувцар икәр соньмсад, өврв.
Хальмгин күүкд төрскн һазр медүлгч өвәрц ке-сәәхн хувц-хунр өмсж сцен деер һарв гиж Тенгира Дорджиева келнә. Келхд, Тенгира түрүн болж иим ик сцен деер һарв. Келн-улсин йоста байр болсн цагт Якутск балһсна бәәрн әмтн болн гиичнр нарта-делкәд нер туурсн дизайнермудын келн-улсиннь янзар үүдәсн хувц-хунр хәләж чадв. Тенгира Дорджиеван келсәр, Хальмг танһчин модельер Алла Букаеван үүдәсн хойр коллекц марһана программла дигтә ирлцәд бәәв.
Тенгира Дорджиеван келсәр, түрүн болж иим ик сцен деер һархд күнд болв. Хальмгин хувцн-хунр йилһрәд бәәв. Юнгад гихлә дегд ке-сәәхн болв. Йоста профессиональн моделин өнгтә болж һарв.
Марһанд ут-тоодан зун дизайнер орлцв. Эдн жюрин оньгт кесг коллекцан үзүлв. Иим үүдәгч марһана һол күцлнь — келн-улсин авьяс-зангшалд хувц-хунр болн бәәцин таал гүн кевәр шинжлһнд дөн күрглһнә төлә иим марһан бүрдәж давулгдна. Иим фестивалин йовудт кесг әмтн олн —зүсн келн-улсин сойлар болн эрдмәр соньмсна.
Ээнән Делгр, Котина Валерий
