Элст балһснд баһ наста өрк-бүлмүдин марһан болв
Хамгин билгтә, хамгин чанһ-чиирг. Иим нер зүүхин төлә Элст балһсна баһ наста өрк-бүлмүд дөрлдв. Бичкдүдин үүдәлтин бәәшнгд хотл балһсна мэрийн эрдм-сурһулин заллтин бүрдәсн дөрлдән болв. Эк-эцкнр болн бичкдүд олн-зүсн марһаст орлцад, дииләчән йилһв. Соньн дөрлдән йоста сергмжтә байрт хүврв. Баһ наста өрк-бүлмүдин марһана тускар мана зурцд келгджәнә.
Хамгин билгтә, хамгин ухата, хамгин чанһ-чиирг. Иим нер зүүхин төлә Элст балһсна йисн өрк-бүл цуг медрлән болн билгән үзүлж дөрлдв. Жил болһн болдг өрк-бүлмүдин марһаг олн улс ирж хәләв. Өрк-бүлмүдин билгиг шишлнг жюри үнлв. Элст балһсна мэрийн эрдм-сурһулин заллтин әнгин ахлач Наталья Бютцинован келсәр, иим марһа эрк биш бүрдәх кергтә. Энүнд өрк-бүлмүд цуг билг-эрдмән үзүлж чадна. Өрк-бүләрн яһж эдн бәәнә. талдан өрк-бүлмүдиг хәләһәд, дамшлтарн хувалцна. Иим керг йир сән гиж санжана.
Эк-эцкнр болн эднә үрдүд, олар цуглрсн әмтн хамдан ду дуулад, би биилв, шүлгүд умшв, театральн наад үзүлв. Зүткәтә дөрлдән ашт Өрк-бүл нертә марһана цуг девснгин хөөн түрүн орм Конеевихна өрк-бүл түрүн орм эзлв. Конеевихна өрк-бүлин келсәр, иим дөрлдән йир икәр таасгдв. Марһана йовудт бидн ни-негн кевәр дөрлдләвидн. Дөрлдәнд белдвр кесн цагт кесг соньн тоо медж авлавидн. Бидн эврәннь унг-тохман сәәнәр меддг болвидн. Энүнә төлә архивин материалмуд олзлх кергтә болв. Хойр долан хонгтан тохнята белдвр кесн цагт бидн улм бат өрк-бүл болвидн. Йир соньн болв гиж эдн келнә.
Элст балһсна өрк-бүлмүдин марһана ашар хойрдгч орм Мошулдаевихан өрк-бүл эзлв, һурвдгч ормд Головатенкон өрк-бүл һарв. Диилвр бәрсн өрк-бүл болн призермуд нүтә мөрәһәр ачлгдв. Келхд, дөрлдәнд орлцсн цуг өрк-бүл блег уга үлдсн уга.
