Өвсн мууһар урһсн бийнь, Шатта нертә эдл-ахун механизатормуд олна малд хот белдж авчана

Эн өдрмүдт селәнә эдл-ахун көдләчнр олна малд хот белдж авчана. Эн жилин зунар һан халун болад, өвсн теегт мууһар урһв. Тер бийнь механизатормуд халун болв чигн амр биш көдлмшән цаарандан күцәжәнә.

Эн өдрүмдт селәнә эдл-ахун көдләчнр олна малд хот белдж авчана, хөд кирһлһнә көдлмшән төсәв, хаврин кемд олна хөөдәс сән авв, бод малас төл бас сәәнәр авгдв. Шатта нертә племзаводын директор Баазр Муджаевин келсәр, ода эдл-ахуд олна малын то жил ирвәс өсәд йовна. Энүнә тоолврар, эннь малчнр хамгин сән аш болжана. Шатта нертә племзаводын директор Баазр Муджаевин келсәр, сүл цагт олна малын то, тер тоод хоодин болн өвртә бод малын то икджәнә. Урднь зун үкрин тоод найн зурһан —найн долан туһл авгдсн болхла, ода зун үкк болһнас йирн туһл авгджана. Зун хөөнә тоод болхла зун арвн хурһн авгдв.

Жил ирвәс олна малын то икдснь малчнриг, эдл-ахун болн района һардачнрт бахмж өгчәнә. Болв эн туст үвлин кемд малын хот белдж авлһн хурц төрт хүвржәнә. Шаттиночка нертә царнгин аһу нег минһн хойр зун гектар тогтажана. Эндр өдрт тавн зун тонн өвсн белдж авгдв. Олна малд эн кемжән күрх зөвтә, тер бийнь эн зунар өвснә урһц дегд сән биш. Өрүн эртәс авн өвс хадһлһна хойр бригад кеер һарад көдлнә. Энүнд арваһад күн көдлжәнә, өвс шахдг хойр техник болн өвсн хаддг хойр косилк бәәнә. Механизатор Владимир Музаевин темдглсәр, догшн халун болв чигн, арһ уга теегт көдлх кергтә. Һан халунд сән чинртә өвсн өгрәд үржәхнь селәнә көдләчнрт ик һундл болжана. “Шатта” племзаводын бригадир Канур Чавлиновин келсәр, хаврин кемд царнгудт ус орулхд күнд болв. Баһар усн орулгдв. Ода урһсн өвс ахр болзгт хадж авх кергтә болжана.

Механизаторин тоолврар, намрин-хаврин цагт тәрән көдмш кесн цагт, ямаран урһц һархнь меддг арһ уга. Зәрм жилмүдт хур-чиг баһ болна, зәрмдән хур-цасн элвг болна. Тегәд тенгрин бәәдлд нәәлгго, малын хот эрк биш ик урдаснь белдж авх кергтә. Тиигхлә олан мал бүрн-бүтнәр үвлзж һарна.

Азыда Надежда, Хулхачин Николай