Удл уга электронн правительствин дөнгәр Хальмг танчһин әмтн олн-зүсн документ һарж авч чадх
Хальмг танчһд удл уга электронн правительствин дөнгәр олн-зүсн документ һарж авч болх.
Электронн эв-арһар государственн туслмж өгхин төлә нәрн техник кергтә гиж чиновникүд келнә. Иим техник олзлад, олн улс күүндх кергтә болжана. Электронн правительств бүрдәлһнә төлә күцәгч йосна цуг органмуд хоорндан хәрлцә бәрж көдлх зөвтә болжана. Өдгә цагт хальмг танһчин правительств электронн эв-арһар государственн һучн туслжм күргж чадх.
Ода деерән техник углж тәвх кергтә, дала мөнгн кергтә болх. Тегәд шин систем эн жилин сентябрин нег шинд эклж көдлх. Ода деерән федеральн ведомства сиим туслмж авч болх. Үлгүрнь, һазадын орна шин паспорт иим кевәр авч болх. Энүнә төлә государственн туслмж күргдг сайтд орад, темдглж бичгдх кергтә. Ода деерән социальн чинртә һучн муниципальн болн государственн туслмж авч болжана. Электронн правительств олзлһна төлә Ростелекомла ирлцнүһ бооцан батлж авгдв. Ода танһчин арвн һурвн чинһн күн интернет олзлж иим туслжм авч чаджана.
“Ростелекомин” Хальмгин филиалын директор Арслнг Корняковин келсәр, эн программ күцәхин төлә танһчин райодт болн Элст балһснд интернет олзлхин төлә бооцан батлж авгдв. Ода зун арвн негн селәнә муниципальн бүрдәцәс һучн хойр селән иим залһлда олзлж чадх.
Электронн эв-арһ ода деерән эс олзлдсн бийнь, государственн органмуд әмтнәс үлү справк сурх зөв уга. Шин закаһар күн болһн эе халхар зокал эвдсн һардачнрин тускар эрлһ орулж чаджана. Государственн эс гиж муниципальн туслмж цаглань эс күргсн көдләч һучн минһн арслнга ялд унх.
Колдан Наталья, Колдан Церн
