Алексей Орлов Лаганск районд одв

Хальмг танһчин толһач Алексей Орлов Лаганск районд көдлмшин кергәр одв. Эн саамд районд одхларн танһчин ахлач олн-зүсн харһлтс кев, селәнә улсиг үүмүлжәх төрмүд хаһлв.

Лаганск района Красинское селәнә әмтн эн байрта зәнгиг һурвн жилдән күләв. Селәнә улст уудг усна сурвлжн байрин бәәдлд секгдв. Энүнә тасм керчх күндтә даалһвр танһчин толһач Алексей Орловд, ветеранмудын района хүүвин ахлач Надежда Лагаевад болн СМО-н депутат Василий Егоровд өггдв. Красинск СМО-н толһач Юрий Жигульский келсәр, өдгә цагт зун хөрн дөрвн герт усн орулгдв. Бийән уһадг һазр, туалет орулсн һучн хойр гер бәәнә.

Ода селәнд нег минһн күн бәәршлжәнә. Эднә нерн деерәс нег өрк-бүл танһчин толһачд ханлтан өргв. Любовь болн Анатолий Ходжгуровихн Алексей Маратовичиг гертә гиичд дуудад, халун жомбаһар болн боорцгар тоов. Энүнә хөөн танһчин толһач кергәрн цаарандан йовв. Эн өдр уудг сән чинртәу сн бәәрн селәнә улсин гермүдт ирсн деерән, Красинск школд болн бичкдүдин садт бас ирв.

Лиж Манджиевин нертә Красинск дундын школын директор Сергей Нимевин келсәр, школд ода тосхлтын көдлмш гүргүдән. Дулан туалетмуд тосхгджана, бичкдүдин садт усн бас орулгджана, тер мет столовд бас усн ирх. Ода көдлмш күч авчана.

Лагань балһсна бәәрн күүкд күн Нурбеки Насуновин өрк-бүлд талдан байр учрв. Эн өдр танһчин толһач Алексей Орлов эн өрк-бүлд болн дәкәд района арвн негн өрк-бүлд шин патьрмудын түлкүр бәрүлж өгв. Көк тенгсин уснд авлгдсн улсин шин гермүдт нүүлһнә программар иим гермүд тосхгдв. Ут-тоодан дәкәд дөрвн гер бәрх зура бәәнә. Цуг иим гермүд Лагань Сити гиж нерәдгдх.

Нурбекя Насунован келсәр, сән патьрмуд. Цевр цер, сарул. Цуг коммуникац бәәнә. Усн, электрокүчн болн газ орулгдв.

Аштнь танһчин толһач Алексей Орлов Лаганск района цутхлнг больницд одв. Энд танһчин һардачд шинрүлгдж ясгдсн төрлһнә әнг үзүлв. Тер мет энүнд углж тәвгдсн шин оборудовань бас үзүлв. Эннь шин өдгә цагин томограф болн рентген оборудовань.

Лаганск района депутатрин хургин ахлач Герман Бадма-Халгаевин келсәр, медицина халх эрк биш шинрүлх кергтә болжана. Эмч ямаран ик дамшлтта болв чигн, оборудовань угаһар көдлж чадшго. Гем цаглань итлкж авхин төлә шишлнг аппарат болн оборудовань кергтә. Цааранднь эм эврән эмнүлх шиидвр авна.

Эн саамд Лаганск районд одсна тускар Алексей Орлов ашлж иигж келв. Ода Лаганск район чик хаалһар девшжәнә. Уд луга Көк тенгсин көвәд бәәх район урдк кевәр делгрлт авад, танһчин экономик дик тәвцән орулх.

Елена Алексенко, Бадмаран Владислав