Танһчин правительствин ахлач Баһ Дөрвдә районд одв
Танһчин толһачин даалһвр яһж күцәгджәхин тускар соньмсад, хальмгин правительствин ахлач Игорь Зотов Баһ Дөрвдә районд одв. Эн саамд районд одхларн Игорь Зотов социальн обьектмудт онц оньг тусхав. Танһчин толһач Алексей Орлов Баһ Дөрвдә районд одсн кемд күцәх даалһвр үлдәж. Энүнд хамгин түрүнд бичкдүдин садмуд, школмуд, селәнә сойлын гермүд болн инвестиционн проектмуд орв. Ахрар келхд, танһчин ар үзгин района улсин хамгин түрүнд хаһлх төрмүд.
Далн һурвдгч жилд эдлврт орулснас авн селәнә сойлын герт нег чигн дәкж ясрв кегдәд уга гиж Тундутовск СМО-н администрацин толһач Елена Олейникова танһчин правительствин толһачд келж өгв. Зуг ода түрүн болж йилһж өгсн һурвн зун минһн арслнгар август сард герин ора шинрүлх, дула өгдг систем сольх көдлмш кегдхмн. Энүнә хөөн хуучн модн терзин ормд пластикин терз углж тәвгдх, шин суудл болн сценическ хувц-хунр хулдж авгдх. лайф сойлын герин һардач келсәр, энд “Народный” нертә коллектив бәәнә. Эдн йир сәәнәр дуулна.
Ода Баһ Дөрвдә районд хамгин хурц төрнь уудг усна төр. Эндр өдрт усна сурвлжна залһлдан икдснәс көлтә эн төр хурц төрт хүврв. Ода Баһ Дөрвдә районд һурвн усна булг бәәнә. Эднәс нег булгнь хуучрад, капитальн ясвр кех кергтә. Баһ Дөрвдә РМО-н аһуд һазр дор бәәх усна ГОСТын кемжәнд ирлцжәнә. Тегәд уудг усна дәкәд нег немр булг бурһудх шиидвр авгдв. Энүг йирн хойр метрт гүүндән бурһудх кергтә. Усна сурвлжиг муниципальн мөнгәр кех зура бәәнә. Ут-тоодан эн проектын үн нег сай хойр зун минһн арслнг тогтажана. Ода муниципальн йосн тосхлтын организац хәәж авчана. лайф района администрацин элч келсәр, иим ус әәмшг угаһар ууж болх. Элст балһсна улс ирхләрн эндәс ус авч хәрнә.
Тер мет авгсут сард Баһ Дөрвдә муниципальн бүрдәцин аһуд тоосхин завод эдлврт орулгдх зурата. Шин предприять танһчин тосхлтын халхд ик урмд өгх зөвтә. Ут-тоодан шин тосхлтд хойр зун сай арлснг йилһж өггдв. Эн жил арвн тавн сай тоосх кех зура бәәнә. Шин заводт зун көдләч көдлхмн. Дәкәд болхла шин предприять пласткин терз, урһмл мод урһаж авх, уста үзм промышленн кемжәнд урһаж авх. Тегәд шин завод района хамгин ик предприять болх зөвтә. Энүнә кеж һарһсн түрүн тоосхас арвн патьрта гер тосгджана. Келхд, тоосх бәәрн шаврас кегджәнә. Шин гер зунынчилгчәр эдлврт орулгдх. Тер мет эн кемд района цутхлнг селәнә хойр бичкдүдин садт ясврин көдлмш төгсх.
Танһчин правительствин ахлач Игорь Зотовин келсәр, танһчин толһачин даалһврар, Тундутово селәнә улсиг уудг усар теткх кергтә. Эн көдлмш ода кегджәнә. Энд күцәгджәх көдлмш бүрткж хәләв. Августын чилгчәр көдлмш төгсх гиж района толач Геннадий Петрович иткүлв. Эн төр района улст хамгин ики чнртә төр болжана. Тегәд энүг хаһлх кергтә. Тер мет Баир нертә бичкдүдин садт ясвр кегдх.
Баһ Дөрвдә района администрацин толһач Геннадий Золочевский келсәр, районд дошкольн учрежденьст орх чеерүд уга кегдх. Тер мет олн бичкдүд оржах садмудас көвүд-күүкд талдан дошкольн учрежедньд орх.
“Солнышко” нертә бичкдүдин садт далн тавн көвүн-күүкн орх зөвтә. Болв ода энүнд зун арвн бичкдүд оржана. Ода районд бичкдүдин садт орхин төлә жирн нәәмн бичкдүд зогсжана. Сентяюрин нег шинд “Баир” нертә дошкольн учреждень секгдх. Тиигхлә эн төр хаһлгдх. Хөрн жил хооран эн гериг искусствин школд өгсн бәәж. Танһчин толһач районд дошкольн учрежденьд чеерүд уга кехин тускар даалһвр өгсн хөөн эн гериг дәкнәс садт өгхәр шиидв. Энд капитальн ясвр кесн хөөн, зун дөчн көвүн-күүкн орж чадх. Тер мет района дөчн хойр күн көдлмштә болх.
Хавтхна Элла, Мятежный Максим
