Уголовн кодекст шин статьяс орулгдв
Уголовн кодекст шин статьяс орулгдв. Энүнәс һарчах федеральн шин закан эдлврт орсн бәәнә. Шин стаьясин үүлдвриг Әрәсән деед зарһ белдж орулсмн.
Һоллгч сатьясас нань немр зурһан шин стаьяс орулгдсн бәәнә. кредит авсн цагт, карт олзлад мөнг авсн цагт, арһлачнрин үүлдврин йовудт, даатлһна болн компьютерн эв-арһ олзллһна халхд кү меклдг йовдл һарһсн цагт эн стаьяс олзлгдхмн. Кемр иим йовдлла харһад, меклгдсн улс эрк биш заһрд цаас орул өгх зөвтә. Тер цагт эднә цаас орулж өгсн йовдлар уголовн керг бүрдәгдхмн. Урд цагт болхла эн йовдл зөв-йос эвдлһнә органмудин хәләврәр күцәгддг бәәсмн.
Кесг жил хоооран би эврән меклгдләв. Тер цагт зуг мана өрк-бүл биш мана региона кесг улс тиимму йовдлла харһла-гиж юридическ номин кандидат Гиляна Цебекова келнә. Дигтә эн төр мини диссертацин төр болв. һурвн жилдән эн көдлмшиг бичв.
«Мошенничество» эс гиж кү меклдг йовдлын керг зөвәр өргн мөн. Эн халхар чик йовдл һарһсн күн чигн ялд унад бәәхмн. Тегәд орулгдсн шин статьяс чик кевәр цуг тоотиг йилһх арһ өгхнь лавта.
Дамшлтта адвокат Валентина Семина келсәр сүл жилмүдт кү меклдг йовдл зөвәр ик делгрлт авсн бәәнә. Зәрм арһлачнр мал өсклһнд орн-нутгин һарһж өгсн мөнгиг эврә онц кергтән олзлсн йовдл мини көдлмшин йовудт кесг дәкч харһла гиж дамшлта адвокат темдглнә.
Мана кесг таньл улс телефоһар, дәкәд болхла мөнгнә халхар үүлдвр бүрдәһәд кү меклдг йовдлла харһад меклгдсн бәәнә гиж Элст балһсна бәәрн улс Очир Антонов болн Гиляна Айдорова келнә. Шин статья сиим йовдлмудас бийән гетлгх арһ өгх гиж санжанавидн. Кү мекләд, олн-әмтнә зөв йос эвддг улс эрк биш засгла харһулгдх гиж санжахан эдн медүлв.
Әрәсән нертә юристнрин тоолврар шин закан зарһин дамшлтиг диглх арһ өгхмн. Олн-әмтнә зөв-йос харслнһд ик ниилчән күргхмн.
Ээнән Ольга, Хулхачин Николай
