Приютненск районд социальн обьектмуд дулан өггджәхш

Дула өглһнә кем эклсн бийнь Приютненск района социальн зәрм обьектмудт ода күртл дулан өггдәд уга. Бамб цецг нертә бичкдүдин садт болн негдгч тойгта дундын школд автономн дула өглһнә систем углж тәвлһнә көдлмш цаарандан кегджәнә.

Приютное селән коммунальник ниицәнә генеральн директор Александр Полонский кесләр, нәәмн хәәсн арвнй исн жилдән көдлв. Эдн хуучрад эдлврәс һарв.

Приютное селәнд хойр хуучн квартальн котельн хаасна хөөн ода социальн обьектмуд автономн дула өглһнә системд орулгджана. Ода иим көдлмш негдгч тойгта дундын школд, бичкдүдин садт, района сойлын герт, администрацин герт, Үлдчн селәнә сойлын герт болн Нарн поселкин бичкдүдин садт ода күртл кегджәнә.

Приютненск района администрацин толһачин дарук Алексей Лахновин келсәр, Эн жил Приютное селәнд хойр квартальн котельн хаасна хөөн зурһан обьектмуд автономн дула өглһнә системд орулгджана. Ода һурвн обьектд ясврин көдлмш төгсв. Талдан һурвн обьектд Приютное селәнд көдлмш төгсхдән өөрхн. Ут-тоодан арвн нәәмн сай арслнг олзлгдв. Энүнәс өрәлинь танһчин бюджет даав, өрәлнь района хазнас йилһж өггдв.

“Бамб цецг” нертә бичкдүдин садт хуучн батареймудыг суһлад, шиниг тәвв. Шин батареймудын өнгнь сәәхн болсн деерән, эдн сән чинртә болн удан олзлгдна. Болв ода насосмуд күртжәхш. Тосхлтын фирм энүг хулдж авсн бийнь, бичкдүдин учрежденьд эдн ирәд уга. Садын ах сурһмжлач Людмила Евланован келсәр, автономн дула өглһнә системд орулхла, дошкольн учрежденьд дулан болх зөвтә. Зуг кезә эн көдлмш төгсхнь күн меджәхш.

“Бамб цецг” бичкдүдин садын ах сурһмжлач Людмила Евланован келсәр, удл уга садт дулан болх. Бичкдүд дәкнәс нааран ирх. Урднь зөвәр серүн болдг билә. Дула өглһнә төр хаһлгдв.

Цаглань дула эс өгснәс көлтә бичкн көвүд-күүкд садт орж чаджахш. Эдн нааран дәкнәс орхан ик кезәнәс авн күләжәнә.

Санан Орскаевин келсәр, ода киитн, дулан хувц өмсх кергтә. Алина Цебикован келсәр, садт орхинь күләжәнә. Тенд дулан болхла сән болх.

Тер мет Приютное селәнә негдгч тойгта школд бас насосмуд уга болад, көдлмш кегджәхш. Энд талдан оборудовань углж тәвгдәд, белн болв.

Приютное селәнә школын директорин дарук Ирина Садченко келсәр, үвлдән школд дулан болх гиж нәәлжәнә. Хам-хоша бәәх школд автономн дула өглһнә систем бәәнә. Тенд дулан, сурһульчнр гиигн хувцта бәәнә.

Цуг танһчар дула өглһнә кем эклсн бийнь, Приютненск районд дула өглһнә кем хооран саагджана. Энд намр ирхинь күләжәсн уга бәәдлтә. Ода дулан өдрмүд тогтснас иштә цөн өдр бәәнә. Тегәд эн таалыг олзлад цуг көдлмшиг төгсәх кергтә.

Елена Алексенко, Максим Мятежный