Иргч хойр минһн арвн хойрдгч жил високосн жил болх
Иргч хойр минһн арвн хойрдгч жил високосн жил болжана. Юлий Цезарин тогтасн юлианск литәр жил һурвн зун жирн тавн өдрәс тогтна. Дөрвдгч жилд болхла һурвн зун жирн зурһан өдр орна. Иим жилиг ик кезәнәс авн олн әмтн йорта жил гиж тоолна. Ирх жил юуһарн әмт әәлжәхмб?
Әрәсәд ик кезәнәс авн високосн жил әрүн Касьянла өөрхн залһлдата. Орс улсин итксәр, Касьяна хәләсн тоот үрж одна. Тер мет високосн жилд хүрм кехд му гиж тоолгдна. Эрк биш хүрм кехлә, чонжин гелнг күргн-күүкн хойрт түрүрләд иигж келдг бәәж. Венчаю венцом, а не високосным концом. Эн туст осрин проавославн шажн ямаран тоолврта бәәхин тускар бидн отец Алексейяс сурвидн. Отец Алексей келсәр, күн болһн чик ухатаһар, буйнч секдлтәһәр бәәхлә, ямаран чигн жил сән болх.
Болв олн улсин ухан-тоолврар, високосн жилд олн-зүсн боомтг учрна. Иим жилд көдлмшән, бүүрән сольх керг уга, мал хулдхла му, бань бәрхд харш, гергн-залу хойр салж болшго гиж келгднә. Болв эннь хоосн йор. Энүнд иткх керг уга. Өдгәц агин статистикин то-дигәр, ивсокосн жилд гемтсн болн өнгрсн улсин то талдан жиләс йилһрхш. Тер бийнь февралин хөрн йиснд төрсн нилхиг талдан өдр төрж гиж бичнә. Зәрм улс иим йорт иткнә, талдан әмтн болхла тас энүнд иткхш.Төвкә Ангаровна Каляева дигтә февраль сарин сүл өдр һарсн өдрән темдглнә. Урднь Хальмгин телевиденьд кесг жилдән көдләд, ачта амрлһн һарла. Олн нәәжнрта, элгн-садн, таньдг улс дала. Зурһан үрән һарһад өскв, ода долан ачнр-зеенртә, нег зеелцнгтә. Негдгч болн хойрдгч девснгин экин медальмудар ачлгдв.
Февраль сарин сүл өдр һарсн болад, эврәннь төрсн өдрән жил болһн мартын нег шинд темдглнә. Дөрвн жилд нег дәкж һарсн өдрән өргәр темдглдг болв.Элстин цутхлнг хурлын ламнрин тоолврар, буддийск зурха юлианск литлә залһлдата биш. Тегәд февралин хөрн йисн олн-үзсн йор уга, эгл өдр болжана. Бурхн багшин номар әмтн буй киискхлә, өршәнһү седклтәһәр әмтнд туслад, цуг әмт тоот амулнг менд бәәхин төлә зальврх зөвтә. Элстин цутхлнг хурлын гецл Баатрин тоолврар, високосн жил гиж йорлх керг уга.Күн болһн цаһан седклтәһәр бәәхлә, энүнд харш болдг юмн уга.
Хурлын гелнгүдин келсәр, оржах жил нарта-делкән зәрм өрн-нутгудт күнд болх. Лу жилд хур-чиг икәр элвгәр орна. Ик сольвр болх бәәдлтә. Лу жилин темдг байн намсрин жил, хө-кишг делгрх.лу жилд төрсн әмтн бат, чанһ-чиирг болна, бәәхтә жирһлин хаалһар бәәх. Тегәд високосн жиләс әәх кергтә.
Колдан Наталья, Бадмаран Владислав
