Негдгч микрорайона общежитьд электрокүчнә залһлданд эвдрлт учрад, сунһуг шатв
Әврәннь зөвән яһж харсхмб? Энүнә тускар альдаран одхмб? Элст балһсна негдгч микрорайона нег обшежитин бәәрн улсиг иим хурц төр үүмүлжәнә. Электрокүчнә залһлданд эвдрлт учрад, сунһуг шатв.
Кемр түүмр үнтралһна церглт цаглань эс ирсн болхла, энд йоста аюл учрх бәәсмн. Ольга Веселован келсәр, подьездд бәәх электрокүчнә оборудованьд һал цәклсинь үзчкәд, икәр әәв. Энүнәс көлтә патьрт шатжах лампочк генткн гилвкәд, пард гиһәд унтрв. Тер дарунь күүкд күн энергетическ компаня деспетчерск церглтд жиннүлхлә, тедн нөкд болхар седж уга. Тана герт явср кех зөв уга гиж эдн келв. Тегәд арһ уга күүкд күн МЧС-т жиннүлв. Ольга Веселован келсәр, иим ик эвдрлт учрснд, күн дөн күргсн уга. Энергетическ компань мадниг соннсн уга.
Әәһәд үүмсн цагт хувц уһадг машинкин тускар күүкд күн мартв. Ода эн машинкиг яһж ясхмб? Машинк шатад хамхрж одв.Энтн үнтә машинк болжана гиж Ольга Веселова һундлтаһар келнә.
Энүнлә хам-хоша бәәх патьрьт бас юмн хаһрсн ә сонсгдв. Тенд телевизор шатснь хөөннь медгдв. Энүг ода ясж болшгон тускар эздүднь медв. Тер мет дәкәд нег өрк-бүлд һару һарв. Тер цагт эдн гертән уга бәәж.Эднә герт бәәсн цуг бәәцин техник шатад, эвдрж одв. Ода олн әмтнә һару кен даахмб? Данцалһна мөнг яһж авхмб? Эн сурврмудт хәрү авхин төлә бидн Роспотребнадзорин заллтин көдләчнрт одвидн.Ведомствин әнгин ахлачин дарук Валерий Джаврунов һарутсн улсла эврән харһад күүндхәр шиидв. Специалистын цәәлһсәр, бәәцин техник шатсн болхла, иим улс тер дарунь шишлнг церглт дуудад, шинжлт кех зөвтә. Тедн һарун үн тоолж һарһна. Тер мет энүнә тускар залврин компаньд зәнглх кергтә. Компаня көдләчнр эвдрлтын учриг медж авад, кен һару данцахинь медж авх зөвтә. Эн туст энергетическ эс гиж залврин компань һару даах закан бәәнә. Роспотребнадзорин әнгин ахлач Валерий Джавруновин келсәр, кемр электрокүчнә халхар эвдрлт әмтн бәәдг герин межә һатц учрсн болхла, энергетическ компань һаруһинь даах, гер дотр им эвдрлт болсн болхла залврин компань гемтә болж һарх.
Кемр һару данцах компань бәәрн улсин неквр эс күцәхлә, әмтн һару данцахин тускар зарһд эрлһ орулж өгч чаджана.
Чучян Валентина, Ирчин Алексей
