Көглт селәнд эн жилин чилгчәр газ ирх зөвтә
Көтчнрә района Көглт селән газ уга танһчин дөчн дөрвн селәнә тоод оржана. Энд газин сурвлжна тосхлт давсн жилд эклсн билә. Энүнә төлә селәнә социальн делгрлтин программар һурвн сай арслнг йилһж өггдв. Сурвлж татлһна цуг көдлмшиг эн жилин чилгәр төгсәх зура бәәнә. Ода болхла селәнә әмтн урдк кевәр бешән модар болн нүүрсәр түлжәнә.
Газ ирх байрта йовдлд пенсионерк Нина Лысенко ик кезәнәс авн белдвр кеж. Газин шин беш хулдж авад углж тәвв, счетчик белн бәәнә. Ода деерән урдк кевәр бешән модар түлжәнә. Селәнә улсин гермүдт газ ирхинь тенкән уга гидгәр күлжәнә. Пенсионерк Нина Лысенко келсәр, үвл дегд киитн болсн уга. Тер бийнь беш түлх кергтә болв. Газ ирхлә амр болх. Беш түлх керг уга, амрх цаг дала болх.
Селәнд кимд түлән ирхлә, пенсионерк бешән хамхлж чадх. Тиигхлә кухньднь талдан юм тәвх орм һарх гиж Нина Михайловна келнә. Хамгин сәнь — үвлд түлә белдж авх керг уга болх. Жил болһн үвлин кемд зурһан кубическ метр мод белдж авх кергтә болна. Энүнд дала мөнгн һарна. Зуг хамгин зовлнгтань мөнгнә төр биш. Медәтә улст үвлд мод хамхлхд, нүүрс герт орулхд күнд болна. Зәрм медәтнрт элгн-саднь болн социальн көдләчнр дөн болна. Көглт селәнд гах орулхин төлә сурвлжна тосхлт давсн жилд эклсн билә. Тиигхд федеральн, танһчин болн бәәрн бюджетмудас һурвн сай асрлнгй илһж өггдсн билә. Эн долан хонгт селәнә социальн делгрлтин программар дәкәд һурвн сай долан зун хөрн минһн арслнг ирв.
Көглт селәнә ахлач Валентина Яковенко келсәр, селәнә хойр зун тәвн герәс зун һучнь газ орулхд белн болв. Цуг документ бәәнә. Газин болн түүмр унтралһна әнг бүртклһ кех зөвтә. Усн селәнд бәәнә. Гер болһнд усн орулгдв. Газ ирхлә балһсна улсла әдл таалта болх.
Көглт селәнә улсин гермүдт кимд түлән хйор минһн арвн хойрдгч жилд ирх бәәсмн. Болв мөнгн ховр болад, тосхлтын көдлмш хооран саагдв. Ода эн көдлмш төгсәхин төлә хөрн сай арслнг кергтә болжана.
Танһчин ЖКХ-н болн энергетикин министерствин әнгин ахлач Александр Ермошкаевин келсәр, хойр минһн арвн хойрдгч жилдж газ нааран орулж чадсн угавидн. Селән дотр турва татх мөнг уга болж һарв. Ода иргч хойр жилд нәәмн зун һучн тавн сай арслнг темдглж авгдв. Энүнәс тәвн зун сай арлснг гермүд хоорнд газин сурвлж татхин төлә олзлгдх.
Танһчин ЖКХ-н болн энергетикин министерствин әнгин ахлач Александр Ермошкенко келсәр, Әрәсән талдан регионмудла дүнцүлхлә, Хальмг танһч газар тетклһнә халхар нүүрт йовна. Танһчин зун йирн йисн селәнәс ода деерән зун тәвн селәнд газ орулгдв. Тер тоод Лаганск болн Целинн райодын цуг селәдт кимд түлән оурлгдв. Кемр Тугтн, Көглт, Һоожур болн Сараха селәдт заг орулгдхла, Көтчнрә район бас эднә тоод орх.
Ээнән Ольга, Ирчин Алексей
