Миграционн церглт дарани рейд кев
Миграционн церглтин көдләчнр мана орн-нутгас нүүж һархасн зулжах эс гиж зөв угһар көдлжәх һазадын ордудын улсиг болн гражданств уга әмтиг илткж авлһна төлә шишлнг рейд күцәв.
Узбекистана дөчн һурвн наста бәәрн күн Махаммадрасул Курбанов Хальмг танһчд давсн долан хонгт ирв. Әрәсәд көдлмш хәәһәд һурвн жилдән иржәнә. Урднь Новосибирск болн Иркутск балһмдт көдлжәсмн. Нааран энүг нег һазра улс дуудж авч. Энд дулан болн әмтн цаһан седклтә гиж келж. Цуг кергтә документ энүнд бәәнә. Ода зуг онц эздүдт көдлмш кех зөвшәлин цаас күләжәнә. Узбекистана бәәрн күн Махаммадрасул Курбановин келсәр, одахн нааран ирж. Хальмг танһчд түрүн болж иржәнә. Гертнь хойр күүкн, нег көвүн өсжәнә. Эдниг асрх кергтә. Тегәд көдлмш хәәһәд ирж.
Энүнлә әдл улс мана танһчд олар ирнә. Мурат Муллаев бас Узбекистанас ирв. Энүнә өмн Москва балһснд көдлж. Энүнә келсәр, ода Әрәсән хотл балһснд иим көдләчнр дала болв. Тегәд тенд көдлмш олж авхд күнд болв. Тегәд мана танчһд ирәд, тосхачин көдлмш кежәнә. Узбекистана бәәрн күн Мурат Муллаевин келсәр, Хальмг танһчд түрүн болж иржәнә. Урднь Москва балһснд көдлжәсн бәәж.
Иим рейдмудыг миграционн церглтин көдләчнр өдр болһн гилтә күцәнә. Эдн тосхлтын обьектмудт, тәрәнә һазрт болн әмтн бәәдг гермүдт бүртклһ кенә. Ах инспектор Баатр Эренценовин келсәр, һазадын ордудас ирсн әмтн нурһлж иим бәәцин таалд бәәнә. Эднә хораст унтдг орн болн хот уудг ширә бәәнә. Хальмг танһчар Әрәсән миграционн церглтин әнгин ах инспектор Баатр Эренценовин келсәр, эн саамд миграционн зака эвдсн йовдл илткгдсн уга. Һазадын ордудас ирсн цуг улст кергтә документ бәәнә.
Ут-тоодан эн жилин эклцәс авн ФМС-ин көдләчнр зун далн зурһан административн протокол бичв. Эднәс зака эвдж көдлжәх улсин тускар һучн протокол бичгдв, Әрәсән аһуд бәәлһнә диг-дара эвдсн улсин тускар жирн йисн протокол бичв. Әрәсән миграционн закана неквр эдсн әмтн административн засгла харһулгдад, хойр минһн арслнгас авн тавн минһн ял онц улс өгх зөвтә, цол даажах көдләчнр хөрн тавн минһнәс авн тәвн минһн арслнг күртл ял өгх зөвтә. Юридическ улс хойр зун тәвн минһн арслнгас авн нәәмн зун минһн арслнг күртл ял өгхмн. Хальмг танһчар Әрәсән миграционн церглтин әнгин ах инспектор Баатр Эренценовин келсәр, нег долан хонгин эргцд Узбекистана йисн күн административн засгла харһулгдв. Эдн ял өгв. Тер мет эднд көдлмш өгсн Әрәсән әмтн бас засгла харһулгдв.
Һазадын ордудас ирсн улсин документнь чик гиж рейдын йовудт медгдв. Эндр миграционн церглтин көдләчнр һазадын ордудас ирсн улс көдлжәх обьектмудт одх.
Шаран Баира, Котина Валерий
