Яшкульск района бичкдүдин поликлиникт ясвр кегджәнә
Яшкульск района бичкдүдин поликлиникин герт капитальн ясвр төгсжәнә. Эн жилин январь сарас авн хирургическ болн төрлһнә әнгүдин гермүдт ясврин көдлмш кегдәд, гемтә улсин бәәцин таал ясрв. Энд электрокүчнә сунһуг сольгвд, терз-үүдн шинрүлгдв, дула өглһнә систем ясгдв. Энүнә төлә нәәмн сай зурһан зун минһн арлснг йилһж өггдв. Май сард бичкдүдин поликлиникд цуг көдлмш төгсх зөвтә. Эн болзгт капитальн ясвр төгсхий аль угай?
Больницин хойр әнгд кесн капитальн ясврин хөөн энд у-сарул болв, бәәцин таал ясрв. Тегәд селәнә әмтн энүнд бийән эмнүлхдән дурлжана. Надежда Цибанован келсәр, урднь энд иим сән таал уга цагт района улс ик һару һарһж талдан эмнүлин учрежденьд оддг бәәсмн. Ода болхла больницд халун усн бәәнә, бийән уһадг хора бәәнә. Энд балһсна больницла әдл бәәцин цуг таал бүрдәгдв гиж күүкд күн байрлжана. Яшкуль селәнә бәәрн күүкд күн Надежда Цибанован келсәр, ода больницд ке-сәәхн болв, нүдн байрлна. Ода мана района күүкд улс Элст балһснд одлго энд бийән эмнүлх гиж санжана.
Больницд капитальн ясвр кехин төлә района бюджетас нег сай хойр зун минһн арслнг йилһж өггдв. Эн мөнгәр акушерск әнг бас шинрүлгдв. Яшкульск района больницин акушерск әнгин һардач Галина Минееван келсәр, кесг жилдән ясвр кегдәд уга билә. Иим сән ясвр кеснд ик байрта бәәнәвидн. Мана района күүкд улс иим бәәцин сән таалд гиигрнә. Урднь дегд му бәәдлд билә. Ода болхла тас талдан бәәдл үзж болх. Цуг көдлмш сән чинртәһәр кегдв.
“Энерготеплосбережение” нертә района программар дөрвн зун минһн арслнгд терз-үүдн сольгдв. Тер мет больницин хойр әнгд шин оборудовань углж тәвгдв.
Эрүл-менд харлһна халх шинрүлһнә программар района талдан селәдт шин автомобильмуд ирв. Утта селәнә фельдшерск-акушерск пунтд бачм чинртә медицинск дөн күргдг шин машин ирв. Уд луга дәкәд нег иим машин района цутхлнгас холл һазрт бәәх селәнд ирх. Тер мет бичкдүдин поликлиникин герин капитальн ясвр төгсж йовна. Энд далн зурһадгч жиләс авн ясвр кегдәд уга бәәж. Май сард энд капитальн ясврин көдлмш төгсх зөвтә.
Района больницин ах эмчин келсәр, эрүл-мендин халх шинрүлһнә программар йилһж өгсн мөнгиг күцц болн цаглань олзлж чадв. Энд хаһлх талдан чигн төрмүд бәәнә. Энүнә төлә бас мөнгн кергтә. Тегәд иим программ цаарандан чигн күцәгдх гиж района әмтн нәәлжәнә.
Ээнән Делгр, Ирчин Алексей
