Яшалтинск района малчнр үвлзлһнд белн
Хальмг танһчин малчнр үвлзлһнд белдвр кежәнә. Танһчин селәнә эдл-ахун министерствин зәнглсәр, үвлд кергтә малын хотын кемжәнәс далн тавн процентнь белдж авгдв. Эн туст Көтчнрә, Сарпинск болн Приютненск райодт күнд бәәдл тогтв. Яшалтинск районд болхла үвалд күрх хот белн. Энд үвлһзлһн кергтә кемжәнәс йирн процентнь балдж авгдв.
Яшалтинск района малчнрин белдж авсн өвснә скирд ик холас дүнгәж үзгднә. Карл Марксин нертә СПК-н специалистнр эврәннь чидләрн үкрмүдин төлә шин хаша хаац бәрж авч. Кошарин дотрк цаһалв. Эн эдл-ахуд иргч үвлзлһн нәәмн зун толһа бод мал оржана.
Карл Марксин нертә СПК-н зоотехник Александр Лябуховин келсәр, малын хот хош болһнд күргж овалгдв. Нәәмн малын хош бәәнә. Малын тооһар өвс күргжәнә. Кергтә кежмән өггдх. Ода зун гектар суданск өвсн хадгдв. Энүг хураж авх кергтә. Хурин хөөн теегт ноһан урһжана. Тегәд һурвдгч хадлһ кех арһ учрх.
Иргч үвлд сән белдвр кесинь Гасановихна малын хошт ирсн цагт мана үүдәгч баг үзв. Энд малчин отхн көвүн Камил эдл-аху хәләжәж. Үвлд белдсн хаша-хаацс үзүлв. Болв хамгин икәр көвүн усна булгд байрлв. Энүг шинәс бурһудад, кесг метрт гүүнәр кев. Ода мал услхд амр болв.
Умар Гасанов болхла эврәннь малмудан буудян урһц хураж авсн тәрән аһуд идшлүлжәнә. Района малчнрин хруц төрнь —малын идг. Иим кевәр эдн малан кеер хәрүләд, үвл иртл гилтә идшлүлнә. Эс гиж талдан һазрт мал хәрүлдг арһ уга. Гасановин келсәр, Яшалтинск район буудян сән урһц хураж авад, оньдин нүүрт һарна, олна мал үвлзлһн сәәнәр белднә. Эднә малын хош хамгин холд бәәсн бйинь, иргч үвлд эдн сән белдвр кев.
Малч Умар Гасановин келсәр, үвлд хаша-хаацс шинрүлж ясж. Өвсн бәәнә, зун тәвн рулон өвсн, һурвн зун рулон солом болн зун тонн өвсн бәәнә. Давсн жилд үвлзлһн бүрдәмжтә болв. Эн жил бас сәәнәр үвлзх гиж санжана.
Специалистнрин келсәр, эдл-ахуд техник ик чинр зүүжәнә. Карл Марксин нертә СПК-д автопаркиг оньдин шинрүлхәр зүткнә. Иим шин техникар өвс белдж авхд амр, өвс цаглань хадж авхд сән нилчән күргнә.
Района АПК-н ах специалист Евгений Рыженко келсәр, ут-тоодан района эдл-ахусд һучн хойр минһн тонн шүрүн хот белдж авгдв, Үвлд һунч зурһан тонн кергтә. Эннь кергтә кемжәнәс йирн процент тогтав. Буудян зүүтә хотар цуг эдл-ахус теткгдв. Ирчг үвлзлһн сәәнәр давх гижсанжана. Солом зу һар процетд белдж авгдж. Өвсн болхла найн процентд белн болв. Үвлд күрх зөвтә.
Ода танһчин эдл-ахусд ут-тоодан зурһан зун йирн долан минһн условн бод мал бәәнә. Эннь давсн жиллә дүнцүлхлә, арвн һурвн минһн толһад ик болж һарв. Энүнә тускар танһчин селәнә эдл-ахун министерств зәнглв. Олна мал бүрн-бүтнәр үвзүлхин төлә долан зун найн тавн минһн тонн шүрүн хот кергтә. Ода болхла эн кемжәнәс далн тавн процентнь белдж авгдв.
Батан Санжирма, Хулхачин Николай
