Элстин искусствин колледжд тәвн һурвдчг сурһулин жил төгсв
Хальмгин келн-улсин искусствд шин нерд һарч ирв. Эннь күләжәсн йовдл болжана. Юнгад гихлә, энд үйнр бас сольгджана. Эднәс ик зунь Элст балһсна искусствин колледжд сурсмн. Эн жил тәвн һурвдгч сурһулин жил төгсв. Танһчин сойлын көдләчнрин то шин баһ наста специалистнр икүдлв.
Элст балһсна искусствин колледж төгсәсн баһчудт диплом орсин театрин герт бәрүлж өггдв. Байрин керг-үүлдврт танһчин правительствин ахлач Игорь Зотов, Элст балһсна болн Хальмгин епископ Зиновий орлцв. Дунд эрдмин сурһуль төгсәсн көвүд-күүкдт эднә жирһлин хаалһин эклцд келгдсн бүлән үгмүд сән урмд өгв. Келхд, оперн дууч, Әрәсән болн нарта-делкән марһасин лауреат Игорь Лазарев бас эн колледж төгсәсмн. Эн байрт нертә дууч бас орлцв. Энүнд Хальмг танһчин ачта артист гидг күндтә нер зүүлһснә темдг бәрүлж өггдв. Энүнәс баһчуд сән үлгүр-үзмж авч чаджана.
Көгжмин медрл уга дунд сурһульд ирсн көвүн, ахр болзгт хамдан сурчасн көвүд-күүкдиг көөж күцәд, сән күцәмж бәрж чадв. Московск консерваторин медлд бәәх көгжмин колледжд орж сурв. Энүнә хөөн Гнесинихна нертә Әрәсән көгжмин академьд сурһулян цаарандан сурв. Эн жил академь төгсжәнә. Энүнд өмн тәвсн күцл дала. Американск продюсерск фирмла удан болзгт бооца батлж авв. Эн фирм дуучин иргчин тускар бооца күцәжәнә. Элст балһсна колледж төгсәсн Катя Зельмеева иим күцәмжин тускар зуг ухалж болх. Игорь Лазаревас сән үлгүр-үзмж авчана.
Колледж төгсәсн Катя Зельмееван келсәр, Игорь Лазарев йир сән болн билгтә дууч. Энүнәс баһчуд үлгүр авх зөвтә.
Катя эврән дууч болад, Игорь Лазаревин дууна билг таасжана. Келхд, көгжмин сурһулин заведеньсин хамгин сән сурһульчнрин төлә Лазарев Вдохновение нертә мөрә тогтав. Эн жил Катя Зельмеева иим мөрәһәр ачлгдв. Үүдәлтин хаалһд шинкн оржах баһчудт дөн болхин төлә иим мөрә өггджәнә. Игорь Лазаревд бас эклц хаалһднь дөн күргсмн.
Хальмг танһчин ачта артист Игорь Лазаревин келсәр, эннь мана иргч үйнр болжана. Эдниг бүрткж хәләх кергтә, эднд дөн күргх зөвтәвидн. Эдн мана сойлын иргч болжана. Ода бәрсн күцәмжәр бахмж келго, нег ормдан зогслго тәвсн күцлдән цаарандан девшх кергтә.
Экин уургар күн көл деерән босна, седклин заляр күн өвәрц болна гиж хальмгуд келнә. Игорь Лазаревд эн үгмүд жирһлин һол зарчм болжана.
Харлун Бадма, Хавтхна Анатолий
