Диабет гемлә ноолда келһнә нарта-делкән өдр эндр темдглгджәнә
Эндр диабетла ноолда келһнә нарта-делкән өдр. Эн өдриг нег минһн йисн зун йирн негдгч жиләс авн темдглдг болв. Эн өдр Канадын номт Фредерик Бантинг төрсмн. Эн нертә эмч нарта-делкәд хамгин түрүн болж бичкдүдт инсулина тәрлһ кеһәд, күндәр гемтсн улсиг харсж авсмн. Кесг зун жилдән әмтн иим гемлә яһж ноолдхин тускар меддго билә. Шикрин диабетар гемтсн улст эдгх ицл уга бәәсмн, нег үлү иим гемтә улс өнгрдг бәәж. Инсулин угаһар иим улс бәәж чаддго билә. Аштнь кесг цагтан гемнәд эдн өнгрдг бәәсмн. Фредерик Бантинг үүдәсн эм кесг сай улсиг харсж авв. Ода цуг нарта-делкәд гемтә улс дунд диабет дөрвдгч орм эзлжәнә. Жил ирвәс иим гемтә улсин то өсәд йовна. Иим бәәдлиг эмчнр йоста әәмшгтә гем гиж тоолжана. Хальмг танһчд нидн жил диабет гемәр гемтсн улсин то тавн минһн күүнд күрв. Ода болхла эн то зурһан минһн дөрвн зун арвнд күрчәнә. Эднәс нәәмн баһчуд болн арвн долан бичкдүд. Эн гемин һол учрин дунд эк-эцкәс үлдсн хуучн, стресс болн йиртмжин му бәәдл гиж специалистнр келнә. Тер мет дегд шимтә хот-хол уухла бас иим гем ирх әәмшг бәәнә.
