Үстин района өөнин байр болв
Давсн амрлһна өдрмүдт Үстин района далн тавн жилин болн Цаһан Амн селәнә хойр зун арвн тавн жилин өөн бәәрн әмтн темдглв. Энүнд спортын болн сойлын программ болв. Байрин утскар мана зәнгч Ээнән Ольга келжәнә.
Байрин керг-үүлдврмүд Цаһан Амн селәнд күч-көлсч коллективмудын болн селәнә муниципальн бүрдәцсин спартакиадас Үстин района спортсменмүд мини-футбольн, волейбольн, армрестлингин, бү бәрж бөк бәрлдлһнә марһаст диилчән йилһв. Байрт района олн медәтнр ирж орлцв.
Хальмг тохма хөөдин хойрдгч фестивальд танһчин хамгин сән гисн тохма мал өскдг эдл-ахус малан авч ирж үзүлв. Эдн цугтан хальмг тохма малыг әрәсән болн нарта-делкән һәәхүлмүдт үзүләд, сән күцәмж бәрнә.
Эндр өдрт Үстин районд бичкдүдин садмудт орх чеерүд уга кегдв. Школмудт болн талдан чигн социальн обьектмудт дула өглһнә автономн систем көдлжәнә. Энүнә тускар Алексей Орлов үстинцнриг йөрәхләрн темдглв. СНХ Танһчин толһач Алексей Орловин келсәр, Үстин район экономикин халхар танһчин хамгин делгрт авчах район болжана. Энд мал өклһн сән үзмж бәржәнә, энд заһс бәрлһнә сән авьяс тогтв. Үстин района цуг улсиг халунар йөрәжәнәв. Района далн тавн жилин өөн болн Цаһан Амн селәнә хойр зур арвн тавн жилин өөн байрта өөн. Тодлх юмн бәәнә.
Байрин конецртин йовудт района күч-көлсч коллективмудын эврә дурар үүлддг артистнр билг-эрдмән үзүлв, тер мет района улсиг Берегиня нертә Астраханск областин Енотаевск района хазгудын дууна ансамбль болн Өөрднр нертә бииһин государственн театрин артиснр икәр байрлулв.
