Вознесеновск школд ясвр кегдв
Сентябрин нег шин күртл танһчин школмудын белдврин йовуд бүркж хәләгдв. Вознесеновск школд капитальн ясвр кехинь кесг жилдән күләж. Эндрк сурһульчнр шинрүлгдсн школын герт сурһулян дасх. Эрдм-сурһулин халх шинрүлһнә программ школын бәәдл сольв. Энүнд мана үүдәгч баг герч болв.
Эн өдриг селәнә улс кесгтән мартшго. Сурһульчнр ке-сәәхн хувцта, багшнр, эк-эцкнр болн олн гиичнр ирж. Региона толһачиг орсин авьясар тосж авв. Хальмгин зангшалар болхла күндтә гиичд цаһан хадг татв. Алексей Орлов Вознесеновск школд ирснь бас учрта. Энд капитальн ясвр яһж кесинь бүрткхәр ирж. Сентябрин хойр шинлә сурһульчнр шинрүлгдсн школдан ирж сурх. Сурһулин шин жилд школ белн болснь бичкдүдиг, эк-эцкнриг, багшнриг байрлулв. Энүнә тускар Целинн РМО-н администрацин толаһч Виктор Джанджиев келв. лайф Вознесеновск школд капитальн ясвр кех тана даалһвр эн жил күцәгдв гиж Джанжиев темдглв.
Танһчин толһач шинрүлгдсн школын гериг байрин бәәдлд секв. Энүнә төлә школын үүднә түлкүр кегдв. Тенгрт нисж һарсн гөрвлжн көк тенгр дор манна-тиньг бәәж, бәәхтә жирһл эдлхин темдг болв. Танһчин һардврин нилчәр Возенесеновск дундун школ эрдм-сурһулин халх шинрүлһнә федеральн программд орсмн. Тәвн жилдән энд ясвр кегдәд уга бәәж. Ясврн кехин төлә арвн сай арлснг йилһж өггдв. Эн мөнгәр тосхачнр школын гериг шинрүләд, тас талдан бәәдл һарһв. Алексей Орлов иим байрла цуг селәнә улсиг йөрәһәд, шинрүлж яслһна көдлмшин хойрдгч девснг болх гиж зәнглв. Школын герт болн бичкдүдин садт ус орулх зура бәәнә. лайф Алексей Орловин келсәр, тана школын шинрүлж яслһна хойрдгч девнгин йовудт шин сантехник углж тәвгдх. Санитарн кемжәнлә ирлцжәх дулан туалетмуд көдлх.
Иим байрта йовдлыг селәнә әмтн ик кезәнәс авн күләжәсмн. Өдгә цагин сурһульчнр хөвтә бичкдүд бәәж. Энүнә тускар сурһульчнр болн эднә эк-эцкнр келнә.
Тер мет танһчин толһачиг Колосок нертә бичкүдин садт бас күләв. Ясврин көдлмшин зураһар тәвн һуврн хуучн терзин ормд шин пластикин терз углж тәвгдв. Ода зуг герин һазадк кеерүлх кергтә. Эн көдлмшиг удл уга эклх гиж региона толһачиг эдн иткүлв.
Энд дәкәд нег харһлт болв. Целинн района далн тавн жилин өөнин программар сойлын герт байрин керг-үүлдвр болв. Вознесеновцнр эврәннь селәнә делгрлт ик тәвцән орулсн улсиг йөрәв. Эднә ик зууднь Хальмг танһчин күч-көлснә ветеран гисн күндтә нерн зүүлһгдв. Эдниг Алексей Орлов йөрәхәр ирв. Күч-көлснә ветеран Людмила Игнатован келсәр, танһчин һардачнрт ик ханлтан өргжәнә. Пенсионермудыг мартжахш. Сар болһн тавн зун арслнг авдг болв.
Сүл цаг болжах хүврлт ветеранмудыг байрлулжана. Эднә келсәр, һардачнриг халхас иим оньг эднд тусхадго бәәж. Целинн районд сүл хойр жилд бичкдүдин сад орх чеерүд һурвн зун ормд баһрв. Троицкое селәнд зун йирн көвүн-күүкн ордг дошкольн учреждень эдлврт орхла, чеерүд тас уга кегдх. Шин сад иргч жилд эдвлрт оррулгдх зурата.
