ЖКХ-н тарифмуд ямаран учрар өсснь илткгджәнә

ЖКХ-н тарифмуд дегд икәр өсснь олн әмтиг үүмүлжәнә. Эн төр правительствин онц оньгт бәәнә. Әрәсән президент энүнә тускар шишлнг селвлцә кеһәд, эн туст тогтсн бәәдл шинжлх даалһвр өгв. Келхд, Мурманск областьд тарифмуд хойр зун хөрн тавн процентд өсв. Эн туст Хальмг танһчд ямаран бәәдл тогтв.

Хальмгин хотл Элст балһснд әмтн коммунальн туслжмин мөнгнә тускар үүмәд, буцлт кесн билә. Светлана Доногруппован келсәр, нурһлж олн давхрта гермүдт бәәх әмтн дула өглһнә туслжмин мөнгн дегд икәр өсв гиж үүмсн билә. Доногруппован темдглсәр, эн төриг ЖКХ-н болн энергетикин министертств шинжлв. Юнгад гихлә, усар болн дулаһар тетклһнә халх эн ведомствин медлд бәәнә. Тегәд эдн мөнгнә кемжә тогтах йоста. Тарифмудын церглтин һардач Светлана Доногруппован келсәр, электрокүчнә болн газин тариф мана церглт тогтана. дула өглһнә болн усар тетклһнә тарифиг ЖКХ-н министерств тогтах зөвтә.

Светлана Доногруппован келсәр, давсн жилин сентябрь сард газин болн электрокүчнә тогтасн тарифмуд сольгдсн уга. Эн халхра тарифмуд эн жилин июль сар күртл тоолж һарһгдхмн. Светлана Доногруппован темдглсәр, коммунальн туслжмин мөнгнә төрәр әмтн мана церглтд ирәд, цәәлһвр авч чаджана.

Доногруппован тоолврар, Элст балһснд дула олзлһна туслмжин мөнгн тарифмуд өсснәс көлтә икдсн уга. Олзлсн энергин кемжән өсәд иим бәәдл тогтв. Энүнә келсәр, январин нег шинәс авн тарифмуд өссн уга. Олзлсн кемжән икдв. Энүг шишлнг прибормуд тоолж авна, эс гиж әмтн кемжәһәр туслмжин мөнг өгх зөвтә.

Тарифмудын церглтин һардачин келсәр, иим бәәдлд тогтснд урджнь үүлджәсн тогтаврин үүлдвр зогсаснь му нилчән күргв. Эн тогтаврар, цуг коммунальн туслмжин мөнгн арвн тавн процентас үлү болх зөв уга бәәсмн. Әмтн өгдг коммунальн туслмжин мөнгн нидн жиләс арвн тавн процентас давх зөв уга. Эн жил эн туст кемжән тогтагдсн уга, эн халхар бүртклһн кегдсн уга.

Әрәсән Президент Владимир Путина даалһврар, эн жил коммунальн туслжмин мөнгнә өслт зурһан процентас давх зөв уга. Тарифмудын церглтин һардач Светлана Доногруппован келсәр, ода федеральн тарифмудын церглт Әрәсән Президентин даалһвр күцәхин төлә зөв-йосна ул белджәнә. Эн туст тарифмуд сольгдх эс гиж коммунальн туслмжин мөнг тоолж һарһлна то-диг сольгдх. Тер мет йилһж өгчәх данцалһна мөнгнә кемжә өсх зөвтә.

Сүл цагт яһж тарифмуд өсснә тускар соньмсад, бидн статистикин региональн органас цәәлһвр авхар одвидн. Государственн статистикин федеральн церглтин әнгин ахлач Екатерина Литвинован келсәр, хoйр минһн арвн негдгч жилд тарифмуд хйор дәкж сольгдв. Түрүләд январь сард тарифмуд өслә, дундлад йисн дундур процентд икдв. Давсн жилд дундлад тариф арвн шаху процентд өсв.

Тер саамд танчһин правительствин медлд тогтагдсн көдлмшч комиссь эн халхәар бүртклһ кежәнә. Эн комиссь коммунальн туслмжин мөнгнә өслтин учрин медж авхмн.

Чучян Валентина, Бадмаран Владислав