Шүлгч Нуровин өөнин байр райодт болжана
Эн өдрмүдт Хальмгин олн әмтнә бичәч Нуура Владимир эврәннь далн тавн жилин ончта өөнән темдглв. Энүнд нерәдгдсн керг-үүлдврмүд, харһлтс, литературн асхн хотл Элст балһснд болн таңһчин цуг райодт давулгджана.
Хальмг танһчин олн-әмтнә шүлгч, Әрәсән сойлын ачта көдләч Владимир Нуровиг хальмгин авьясар жомбаһар болн боорцгар тосж тоов. Бәәрн ансамблин артистнр хальмг улсин би биилж өгв. Олар цуглрсн әмтн “Как родник — душа моя” нертә дегтрмүдин һәәхүл ик оньган өгч хәләв. Энүг шүлгч Владимир Нуров бас һәәхв. Ут-тоодан олнәмтнә шүлгч Владимир Нуров һучн дегтр һарһв. Тер тоод “Вкус родника”, “Корень жизни” болн “Светлый образ” нертә дегтрмдүиг умшачнр дурлж умшна. Нег минһн йисн зун далн негдгч жилд Белое желание нертә шүлгүдин түрүн хуранһу хамльг келәр барлгдсн билә. Шүлгчин үүдәлтд оюни ухани туск төрмүд һол орм эзлжәнә. Эврәннь шүлгүдтән Нуров моһлцг һазр деер күн ямаран чинр зүүхин, улсин шагшавдын тускар гүн уха тунһаж бичжәнә. Шүлгч Владимир Нуровин үүдәлт хальмг улсин туужла өөрхн залһлдата мөн. Эцкиннь санлд болн энүнә амр биш жирһлин хаалһин туст нерәдгдсн олн үүдәврмүдән шлүгч нерәдв.
Владимир Нуровин үүдәврмүд нарта-делкән олн келнд орчулгдв, энүнә шүлгүд кесг орн-нутгудт барлгдсмн. Түрүн шүлгән Владимир Нуров Хальмгин педагогическ училишж сучаһад экләд бичсв. Бичкн цагтан болн баһ дүүвр насндан дәәнә көлд орв, хальмгудыг киитн Сиврт нүүлһснә цаг дааж һарв. Целинн района толһач Виктор Дажнджиевин келсәр, шүлгчин жирлһин хаалһ адрута болн күнд болв. Тер бийнь байрта цаг бас учрсн билә. Байр болн зовлнг үзәд, жирһл сәәнәр медж авсн күн гиж района толһач келсн үгдән темдглв.
Харһлтд цуглсрн улст болн күндтә гиичд Шопа Хопа хйор нертә шог наадн үзүлгдв. Ончта өөнлә ирлцүлж Целинн района һардачнр шүлгчд белгүдән бәрүлж өгв. Целинн района администрац күндтә гиичд хальмг улсин хувц өмскв. Шин хувц өмсәд, шүлгч хальмг би биилв.
Ода Хальмгин олн-әмтнә шүлгч Владимир Нуров дарани дегтрән бичжәнә. Удл уга энүг умшачнр умшж чадхмн.
Ээнән Делгр, Котина Валерий
