Гашунск школд ясврин көдлмш кегдв
Давсн жилд противоаварийн керг-үүлдврмүдин федеральн программар танһчи школмудт ясврин көдлмш зун процентд күцәгдв. Хальмг танһчд арвн һурвн сурһулин заведеньд капитальн ясвр кегдсмн. Тер тоод иим көдлмш Яшкульск района Гашунск дундын школд кегдв. Энд шинрүлгдсн герт сурһульчнр сурчана.
Противоаварийн керг-үүлдврмүдин федеральн шишлнг программар школын гер шинрүлж яслһна көдлмш давсн жилин июнь сард эклсн билә. Өдгә цагт болхла дундын школ урдк диг-дараһар көдлжәнә. Школын герин һурвдгч давхрнь шинрүлж ясгдв, герин ора сольгдв, шин терз-үүдн углж тәвгдв. Ода школын герт түүмр учрсн кемд докья өгдг систем бәәнә, дула өглһнә автономн систем көдлжәнә. Энүнә төлә федеральн бюджетас нәәмн сай арслнг йилһж өггдв, муниципальн бюджетас нәәмн зун минһн арслнг ирв. Энүнә тускар Гашунск дундын школын директор Антонина Халгаева келж өгв.
Ода Гашунск дундын школд йирн сурһульч сурчана. Педагогическ коллективин зань күцц — энд хөрн хойр багш көдлжәнә, эднәс зурһан баһ наста специалист. Ода эн сурһулин заведень Александр Очировин нер зүүжәнә. Эн салдс Чеченск республикд церглжәһәд әмнәсн хаһцсмн. Школд иим сән ясвр кеснд салдсин эк-эцкнр болн энүнлә хамдан дәәлдж йовсн Воронеж балһснас ирсн әмтн ик байрта бәәнә.
Воронеж балһсна бәәрн күн Олег Махначевин келсәр, танһч делгрлт авчахнь үзгднә. Шин школ тосхгджана. Эн школ баатр-зөрмг салдс Очировин нер зүүжәнә. Бичкдүд иим баатрмудас үлгүр авх зөвтә.
Хальмг танһчин эрдм-сурһулин министерствин зәнглсәр, давсн жилд мана танһчд арвн һурвн школд шинрүлж яслһна көдлмш кегдв. Энүнә төлә противоаварийн керг-үүлдврмүдин федеральн шишлнг программар тәвн хойр сай арслнг йилһж өггдсмн. Танһчин эрдм-сурһулин, сойлын болн номин министерствин әнгин ахлач Владимир Бочкаевин келсәр, эн жил зәрм школмудт ясвр кегдх. Тер тоод Яшалтинск района Эсто-Алтайск дундын школд, Целинн района Вознесеновск школд болн Октябрьск района Хошуда дундын школд капитальн ясвр кегдх.
Противоаварийн керг-үүлдврмүдин федеральн программ эн жил бас үүлдх. Эннь байрта зәнг. Эн жил Әрәсән правительствин закврар Хальмг танһчин зурһан школд капитальн ясвр кехин төлә һучн долан сай арслнг йилһж өггдхмн.
Бевина Мергн, Очра Сергей
