Улан Эрг селәнд дәәч Эдуар Бораевин санлд нерәдгдсн марһан болв

Яшкульск района Улан Эрг селәнд эн һазра күн дәәч интернационалист Эдуар Бараевин санлд нерәдгдсн волейболн марһан болв. Энүнд нәәмн команд дөрлдв.

Афганистанд цергә даалһвран күцәж йовад әмнәсн хаһцсн дәәч Эдуард Бораевин санлд нерәдгдсн волейбольн марһан жил болһн болна. Энүнд спортын ветеранмуд болн бәәрг школын сурһульчнр орлцв. Иим марһанд орлцсн баһчуд цогц-махмудан батрулсн деерән, төрскнч сурһмж авна. Улан Эрг селәнә школын директор Ноһала Шалбурован келсәр, иим дөрлдән баһчудт йир олз-туста, юнгад гихлә көвүд-күүкд спортар соньмссн деерән, иим дәәчнрәс үлгүр-үзмж авна. Эн дәәнрин зәрмн төрскән харсад, әмнәсн хаһцсмн. Тегд иим марһан төрскнч сурһмж өгнә.

Дөрлдәнд Эдурад Бораевин өөрхн улс, тер тоод элгн-саднь, нәәжнр болн хамдан дәәлдж йовсн улс ирв. Уйн наста спортсменмүд сән наад үзүләд, ирсн әмтиг байрлулв. Улан Эргин дундын школын физкультурин багш Борла Батнасуновин келсәр, мана школд баһчуд волейболд дурта, настольн теннис, мини-футбол, шатр чигн наадна. hаза керг угаһар гүүхин ормд, иим спорт эднд туста болна.

Зүткәтә марһана ашар бәәрн школын сурһульчнрин команд диилвр бәрв. Хойрдгч ормд Троицк гимназин элчнр һарв. hурвдгч орм Яшкульск района Уттинск школын волейболистнр эзлв. Эднд диплом болн талдан чигн ачлвр бәрүлж өгв.

Бевина Мергн, Очра Сергей