Элст балһснд үүдәгч марһан болв
Эн жил түрүн болж Элст балһсна эрдм-сурһулин заллт багшнрин болн сурһмжлачнрин үүдәгч марһан бүрдәв. «Эрдмтә багш» нертә дөрлдән хальмг келәр болв. Энүнд эрдм-сурһулин көдләчнр хальмг келән яһж меддгән үзүлв.
Иим керг-үүлдврт Карун Светлана кесг дәкж орлцжана. Талдан дуучнр болхла иим марһанд түрүн болж орлцжана. Эн саамд Светлана Көк булг нертә ду дуулв. Эннь бас учрта. Юнгад гихлә эн дууг Карун Светланан нег һазра күн үүдәсмн. Бичкдүдин келн-улсин садт дөрвн жилдән сурһмжлач болж көдлжәнә. Энүнә келсәр, ода харм төрхд бичкн көвүд-күүкд хальмг келән сәәнәр медхш. Тегәд чигн садт олн-зүсн эв-арһ олзлад болн хальмгин туульс умшж өгәд, төрскн кел дасхжана.
Хөрн хойрдгч тойгта эклц школын директор Людмила Кетчинован келсәр, дөчн жилдән эн көдлсн бийнь, иим марһаст оньдин орлцна. Иим керг-үүлдврин йовудт дамшлтарн хувалцж болх, тер мет шин соньн медрл авч болна. СНХ Энүнә келсәр, эклц школд олн-зүсн шин эв-арһ олзлж көдлх кергтә. Тер мет компьютер бас кергтә. Дорас өсж бичкдүд хальмг кел оньдин сонсх зөвтә.
«Эрдмтә багш» нертә үүдәгч дөрлдәнд арвн долан школын болн дошкольн учрежденя элчнр марһв. Энүнә йовудт багшнр орлцачнр хальмг келәр ду дуулад, би биилсн деерән, жюрин оньгт бичкн наад үзүлв. Элст балһсна эрдм-сурһулин заллтин ахлач Окна Нәәмнә келсәр, иим керг-үүлдвр багшнр дунл хальмг улсин уул авяьс, кел болн сойл хадһлж олнд тархалһна төлә бүрдәгднә.
Марһана дииләчнрт болн лауреатмудт диплом болн үнтә белгүд байрин бәәдлд бәрүлж өггдв.
Ээнән Делгр, Ирчин Алексей
