Танһчин селәнә эдл-ахус хаврин тәрәнә көдлмшән эклв
Селәнә эдл-ахун көдләчнр хаврин тәрәнә көдлмшән эклв. Энүнлә зерг олна малас төль авгджана, малын хот белдж авгджана. Эн жил урһц сән болх гиж селәнә эдл-ахун көдләчнр нәәлжәнә.
Сүл цагт Приютненск района “Первомайское” СПК-д нурһлж намрин тәрәнд нәәлдг болв. Юнгад гихлә, кесг жил дарандан хаврин тәрәхнәс темдглсн урһц хураж авгдсн уга. Зунын кемд һан-халун болад, тәрән үрж одна. Тегәд чигн эдл-ахуд тогтсн авьясар хаврин кемд намрин тәрәнә һазр белдж авна. Эн жил тавн минһн гектарас арвн минһн тонн буудя хураж авх зура бәәнә. Намрин тәрән сәәнәр һарв. Тегәд темдглсн урһц хураж авх нәәлвр бәәнә. СПК-н ах агроном Иван Тимонина келсәр, намрин тәрәнә бәәдл сән. Эн жил сән урһц һархә бәәдлтә. Эн аһуһас арвн минһн тонн буудя хураж авх зура бәәнә.
Иргчдән буудян тәрәнә аһу икдүлх зура бәәнә. Хурын хөөн һазр невчк хагсхла, мехниазатормуд эд-бод кегдәд уга тәрәнә аһуг намрин тәрәнд белдх. Дәкәд болхла усна боодгудын өөр бәәх Лысый лимана районд улврин һазр урдк кевәр босхж авх зура бәәнә.
СПК-н һардач Анатолий Путеевин келсәр, услврин һазрас олан малд хот белдж авч болх. Комбикормин завод бәрх төсв күцәж болх. Шин завод цуг района эдл-ахусиг малын хотар теткж чадх, тер мет үлүһинь талын һазрт хулдж болх. “Первомайское” СПК-н һардач Анатолий Путеевин келсәр, комбикормин завод тосхж болдх, энүнд өдртән хойр тонн хот белдж болжана. Сардан хойр зун тәвн тонн хот һарһж болх. Складмуд бәәнә. Энүнд арвн минһн тонн буудч орулж болх. Энүг заводт эд-бод кеһәд, эдл-ахусд хулдж чадхвидн. Тер мет районла хам-хоша бәәх фермермүдиг теткж болх. Элтәс тәвн-жирн дуунад бәәх эдл-ахус теткж болх.
Тер мет “Первомайское” СПК мана танючд күцәгджәх “Мраморное мясо Калмыкии” нертә инвестиционн төсвд орх саната. Тиигхлә бордврин плошадкст олна малын то икдүлж болх. Яһад болв чигн, комбикормын завод эдвлрт орулхин төлә энд цуг таал бәәнә. Ода СПК-д өдгә цагин некврлә ирлцәтә селәнә эдл-ахун техник бәәнә. Энд америкин болн немшин машид бәәнә.
Өдгә цагт болхла эдл-ахун көдләчнр олна малас сән төль авхар зүткж көдлжәнә. Энүнә ашар бод малын тоог йисн зун найн толһад икдүлх арһ бәәнә. Эннь мал өсклһнә халхд сән үзмж болхмн. Нег үлү, “Первомайское” СПК-д олна малын хот белһдлһнә халх батрулһна зура бәәнә. Тер саамд мана танһчин зәрм эдл-ахус хаврин тәрә экләд тәржәнә. Танһчин селәнә эдл-ахун министерствин то-дигәр, эндр өдрт арвн минһн гектарт тәрән тәргдв. Ут-тоодан эн жил мана танһчд хаврин тәрән найн минһн гектарин аһуд тәргдхмн.
Чучян Валентина, Очра Сергей
