Хальмгин баатр-зөрмг көвүн Өмн үзгин программд орлцжана
“Народный герой — Юг”. Иим нерәдлһтә түрүн региональн прорамм Өмн үзгин федеральн округд эклв. Энүнд баатр-зөрмг улсин тускар келгдх, әмт харсж авсн йовдлмудын тускар бичгдхмн. Хальмг танһчд иим баатр-зөрмг улс бас бәәнә.
Цөн жил хооран дигтә эн өдр Баир көвүн әмән әрвллго талдан кү үкләс харсж авсмн. Гражаднск даалһвран күцәж чадв гиж ода Баир тер йовдлыг тодлна. Тер өдр зеткртә йовдл учрх гиж күн санжасн уга гиж баир Кичиков тодлж келнә. Һаза хавр, әмтн байрлснь үзгдв. Хамдан сурчасн көвүд-күүкдлә кеер һарад амрх саната бәәж. Эдн нәәмдгч микрорайона зогсалд цуглрв. Олн давхрта герәс хар утан һарчасна тускар гентктн нег күн үзж. Тер дарунь түүмр унтрадг церглтд зәнглж. Дөрвн көвүн дөн болхар һарад гүүв. Нег патьрт бичкн күн бәәхин тускар медсн уга.
Эрднь Тихоновин келсәр, иим кевәр күн болһн нөкд болшго гиж санжана. Байир баатр-зөрмг күн болад, дөн күргхдән оньдин белн. Кү үкләс харсж авлһн ик чинртә керг, зуг баатр күн иим йовдл күцәж чадх.
Эн герин өөр давж һарһхлран Баир тер өдриг тодлна. Байир Кичиковин келсәр, удан ухаллго, тер дарунь нөкд болхар гүүв. Цуг патьрмудт жиннүлв, хойрдгч давхрт һархла, үүдн хаалһата бәәж, патьрас утан һарчасн билә. Хам-хоша бәәх күүкд күн Баирин хәәкрсиг сонсад, түүмр орсн патьрт эврәннь балконас орх селвг өгв.
Баир Кичиковин келсәр, патьрт гүүж орхла, тенд утан дүүрнг, әрә гиж кииһән авв. Уульжасн бичкн күүк үзәд, һар деерән авад, гүүж һархар седв. Болв үүдиг экнь оньслсн бәәж. Балконас күүкиг хам-хоша бәәх күүкд күүнд бәрүлж өгв.
Күүк харсхар ирсн дәкәд нег залу күн котельня көдләч болж һарв. Тер кемд көдлмштән йовж йовсн бәәж. Иим йовдл күн болһнд учрх саам бәәнә, тегәд хажуд зогслго, эрк биш дөн күргх кергтә гиж Баир тоолжана. Эднә ормд тана өрк-бүл иим күнд бәәдлд тусхнь юмн уга гиж эн тоолжана. Баир Кичиковин келсәр, тер цагас авн харсж авсн күүкиг үзәд уга. Хамгин һол кергнь — күүкн әмд, эрүл-менд үлдв. Бийән баатр гиж тоолжахш.
“Народный герой — Юг” программд энүнә тускар нәәжнрнь бичг бичсн тускар сонсчкад Баир икәр өврв. Талдан үлст үлгүр болхин төлә иим йовдлмудын тускар келж өгх кергтә. Зуг бийән Баир баатр гиж тоолжахш. Энүнә ормд талдан күн бас дөн болх билә гиж эн келнә.
Ээнән Делгр, Котина Валерий
