Әмт зөөдг таксистнр зөвшәлин цаасн угаһар көдлжәнә

Тер саамд әмт зөөх лицензь таксистнр авсн угаһинь инспектормуд бүрткж хәләжәнә. Иим зөвшәл угаһар әмт зөөж болшго. Тер бийнь жолачнр зөв угаһар әмт зөөжәхнь бүртклһнә ашт медгдв. Автоинспекцин зәнглсәр, ода алвна органмудт тавн зун жолач темдглж бичгдв. Болв зөв угаһар әмт зөөжәх улсин то энүнәс ик. ГИББД-н көдләчнр болн көлгн-күчнә министерствин элчнр эн төрәр дарани рейд кев.

ГИБДД-н көдләчнр дегц һурвн таксистнриг зогсав. Әмт зөөдг зөвшәлин цаасн эднд уга бәәж. Тер бийнь автомобильд такси гисн темдг бәәж. Келхд, шишлнг зөвшәл угаһар энүг машинд тәвж болшго. Тегәд машинд шашечкс бәәхлә, эннь лицензьта жолач көдлжәсн герч биш болжана. Зогсагдсн жолачнрин тускар протокол бичгдв. Зөв угаһар әмт зөөсн жолачнрин ялын кемжән ик. Дәкәд болхла госавтоинспекцин көдләчнр зөв угаһар углж тәвгдсн такси нертә шамр суһлж авна.

Хальмг танһчар ГИББД-н әнгин ах инспектор Василий Кекеевин келсәр, әмт зөөдг зөвшәл уга болхла, иим жолачнр административн халхар тавн минһн арслнг ялд унх закан бәәнә. Такси темдгтә шам уга болхла ялын кемжән хойр дундур минһн арслнг тогтана. Юридическ әмтн өрәл сай асрлнг ялд унх зөвтә.

Таксиситнрин келсәр, ялын кемжән ик. Иим ик мөнг бичкн балһснд олхин төлә кесг сар кергтә. Тегәд зөвшәл угаһар әмт зөөхин ормд, хойр минһн зурһан зун арслнг өгәд, цуг кергтә документ һарһулж авснь сән болх. Инспектормудын келсәр, полицин көдләчнрин оньг авлулшгон төләд таксистнр машинасн шашечкс суһлж авна. Келхд, әмт зөөдг машина ора деер эрк биш оошг өнгтә шамр бәәх зөвтә.

Эннь закана неквр болжана. Шин закан хойр минһн арвн негдгч жилд батлж авгдла. Дәкәд болхла автомобильд эрк биш цветографическ схем бәәх зөвтә. Танһчин көлгн-күчнә министерствин цәәлһсәр, әмт зөөдг зөвшәл зуг зун жолач авсмн. Эндр рейдын йовудт зака эвдсн жолачнрин тускар һучн эрлһн бичгдв, һурвн административн протокол кегдв. Танһчин көлгн-күчнә министерствин әнгин ахлач Евгений Ченкалеевин келсәр, урднь иим үүлдврт лицензь керг уга бәәсмн. Тегәд энүг жаолчнр күцәдго билә. Тер мет эдн алвна инспекцд темдглж бичгдх зөвтә.

Элст балһсна әмтн такси дурлж олзлна. Жолачнрт лицензь бәәхин тускар соньмсхш. Иим документ бәәхин тускар күн болһн жолачнрас некж чаджана. Тер мет машина салонд жолачин туск зәнг өлгәтә бәәх зөвтә. Эннь бас зака эвдсн йовдл болжана. Иим лицензь бәәхин тускар меднә. Зуг әмтн сурдго бәәсмн. Иим зөвшәлд ик оньг тусхжахш, кергтә ормд күргхлә болжана.

Элст балһсна улсин тоолврар, лицензь авлһн әмтнә әәмшг угаһар йовлһнд сән нилчән күргх зөвтә. Зөв угаһар әмт зөөжәх машинд әмтн суушго. Әәмшг угаһар йовхин төләд ик мөнг өгсн деер болх гиж Элст балһсна әмтн тоолжана. Үлгүрнь, хотл балһсар хуучн машиһар таксистнр әмт зөөнә. иим автомобильмудын техническ бәәдлнь му. Әмт зөөдг жолачнр шишлг зөвшәл авхла, зурһан сар болад машиһан техническ хәләврт орулх зөвтә. Эннь бас закана нег некврнь болжана.

Ээнән Ольга, Очра Сергей