Танһчин райодт хаалһс ясгджана
Ода мана танһчин зәрм райодт хаалһс шинрүлһж яслһна көдлмш күцәгджәнә. Сүл жилмүдт хаалһс шинрүлж яслһна көдлмш күцәгдәд уга билә. Тегәд чигн танһчин толһачла харһда күүндсн кемд селәнә әмтн эн хурц төрәр эврәннь сурврмудан өгдг бәәсмн. Цөн жил хооран танһчин региональн хаалһин сан тогтах шиидвр авгдв. Эн жил энүнә кемжән дөрвн холванд өсв.
Яшалтинск СМО-н толһач Джанганам Казанкина келсәр, селәнд һурвн зун күн бәәршлжәнә. Хаалһин төр хамгин хурц бәәсмн. Хөрн жилдән хаалһ шинрүлж ясгдад уга.
Казанкина келсәр, эн поселкин улсин хамгин хурц төр хаһлгдх зөвтә. Федеральн хаалһла залһжах хаалһ шинрүлж ясгдх. Танһчин толһачин һардврт болсн селвлцәнә дәкд нег орлцач Чагортинск СМО-н ахлач Татьяна Нохаева бас байрран хувалцжана. Эднә селәнд хаалһ ясхин төлә мөнг йовулх.
Чагортинск СМО-н ахлач Татьяна Нохаеван келсәр, селәнә улс икәр байрлжана. Эдн хату девскртә хаалһ күләжәнә. Жирн дууна хаалһар бальчг болхла йодвг арһ уга билә.
Целинн РМО-н толһач Виктор Джанжиевин келсәр, эн девснгд хаалһс асфальтар бүркх зура уга. Тер бийнь күцәх ясврин көдлмшин кемжән дегд ик. Хаалһс яслһна көдлмш танючин тосхлтын болн хаалһин эдл-ахун министерствла хамдан кегдх.
Целинн РМО-н толһач Виктор Джанжиевин келсәр, эн жилин зураһар хаалһст белдврин көдлмш кегдх. Энүнә ашт хату девскртә хаалһ бәрх ул тогтагдх. Танһчин толһачин өгсн даалһвриг күцәх кергтә.
Танһчин тосхлтын, көлгн-күчнә болн хаалһин эдл-ахун министр Кирилл Ботовин келсәр, яслһна көдлмш найн дуунад кегдх зөвтә. Эннь ик көдлмш. Эн жилин июнь сар күртл эн көдлмшиг төгсх зура бәәнә.
Мана танһчд хаалһс шинрүлж яслһна көдлмш кесг жилдән кегдәд уга. Тегәд чигн танючин толһач Алексей Орловла болсн харһлтсин йовудт танһчин әмтн эн хурц төрәр сурврмудан өгдг билә. Цөн цаг болад региональн хаалһин санг бүрдәх шиидвр танһчин толһач батлж авсмн. Энүг тогталһна төлә танһчин правительств ик көдлмш күцәв. Хамгин түрүн муниципальн хаалһсин бәәдл шинжлгдв. Танһчин тосхлтын, хаалһин эдл-ахун министерствин то-дигәр иим хаалһс утдан хойр минһн дууна тогтажана. Хаалһин сангас түрүн мөнгн муниципалитетмудт эн жилин январь сарас авн экләд йовулгдв. Тер тоод Целинн район бас мөнг авв. Орловин һардврт болсн селвлцәнд Целинн РМО-н толһач хаалһсин ясврин көдлмш эклв гиж зәнглв.
Целинн РМО-н толһач Виктор Джанжиевин келсәр, Ода Вознесеновка, Хар Булг, Ик-Чонс, Овата болн Деед Яшкулин СМО-н ахлачнр цуг кергтә документац белджәнә. Ямаран көдлмш кехин темдглж авчана, тосхлтын организацс шүүж авчана.
Тер мет хаалһс яслһна көдлмш талдан чигн райодт эклв. Үлгүрнь, Баһ Дөрвдә районд йилһж өгсн дөврн сай арлснгар Хончнур поселк күртл тавн дууна хаалһ тосхгдх. Тер мет Плодовитое поселк күртл күрдг хаалһин әнг тосхгдх, Тундутовоа поселкд хаалһс ясгдад, хаалһин темдгүд углж тәвгдх. Тер саамд Алексей Орловин даалһврар танһчин правительствин шиидврәр эн жил хаалһин сангин кемжән дөврн холванд икдәд, хойр зун сай арслнг тогтах. Энүнә тускар февраль сард болсн селвлцәнд келгдв. Энүнә ашар премьер-министр Игорь Зотов танһчин журналистнрт интервью өгдә. Хальмгин правительствин ахлач Игорь Зотовин келсәр, эн жилин бюджет хаалһс яслһна төлә йилһж өгх мөнгн дөврн холванд икдв. Тәвн сай арслнгас хойр зун сай арслнг күртл өсв. Энүнәс зун арвн тавн сай арлснг танһчин бюджет олзлх, най тавн сай арслнг селәнә бүрдәц олзлх зөвтә. Эн даалвриг күцәж чадх арһ бәәнә.
Краснодар балһснд болсн селвлцәнд эн төрәр бас күүндвр кегдв. Тенд Николай Патрушевин һардврта Әрәсән әәмшг уга бәәлһнә хүүвин сүүр болв. Энүнд хәләгдсн төрмүд дунд Өмн үзгин федеральн округин субьектмудын аһуд хаалһар әәмшг угаһар йовлһ тетклһнә төрмүдәр күүндвр болв. Хальмг танһчин толһач Алексйе Орлов селвләцнд келсн үгдән эн төриг яһж хаһлхин тускар келж өгв. Ода танһчин хаалһин санг икдүлһнә төлә ирлцнһү көдлмш кегджәнә. удл уга танһчин аһуһар давж һардг федеральн хаалһст видефотокамермуд углж тәвгдх.
Танһчин толһач Алексей Орловин келсәр, нег өдртән Хальмг танһчин аһуһар долан минһн машин давж һарна. Танһчин һардврин темдглсн зура күцц биш. Энүнә төлә дәкәд мөнгн кергтә. Танһчин хаалһин санг икдүлх зура бәәнә. Ода хойр холванд өсв. Энүг иргчдән икдүлх төр тәвгджәнә.
Чучян Валентина, Ирчин Алексей
