Әмтнә мөнг мекләд авч

Финансин пирамид тогтасн бүрдәһәч зарһин засгла харһулгдв. Эн күүкд күн далн зурһан кү меклж. Мек-тах кеһәд, хойр сай арслнг эн күн шингәж авч. Цөн цаг болад, мөнгән геесн улс полицд ирж зәнглв. Зарһин шиидврәр әмтн меклсн күн түүрмд условн суух засгла харһулгдв.

Финансин пирамидын бүрдәһәч күүнә мөнг эзлж авдг эв-арһ тодрха кевәр белдж. Элст балһсна бәәрн күүкд күн Галина Бодрова таньдг олн улсан олзлж көдлжәх һазртан Әлст балһсна улс дунд нөкцлтин касс бүрдәсн тускар болн мөнг цуглулһан утска зәнг тархав гиж зарһин сүүрин йовудт медгдв. Арвн негн минһн арслнг орулж өгхлә йисн минһн арслнг ору өгхәр әмтнд зәнглж. Эн мөнгиг иргчдән мөнг орулж өгсн улсин мөнгәр данцах саната бәәж. Тегәд хамгин экнәс авн эн күүкд күн әмтнә мөнг эзлж авх сана зүүсмн. Мек-тах кеһәд эн күүкд күн хойр сай арслнг хоршав. Финансин пирамидас көлтә далн зурһан күн һарутв.

Элст балһсна прокурорин негдгч дарук Герман Максимовин келсәр, иим финансин пирамид зуг һурвн өдр көдлж. Тер бийнь дала күн мөнгән гееж. Далн зурһан күн һарутв. Хойр сай арслнг һару һарв. Зарһин шиидврәр Галина Бодрова тавн жилдән условн түүрм суух загла харһулгд. Тер мет эн күүкд күн ял өгх зөвтә. Эннь дегд жөөлн засг. Прокуратур энүнлә зөвшәржәхш, эрлһ орулж өгх.

Константин Гофтун келсәр, давсн зун жилмүдин йирдгч жилмдүт ик ору авх санатаһар Сергей Мавроди бүрдәсн финансин парамидын орлцач болв. Энүнә хөөн нанси туршт иим керг оршгов гиж бийдән келв. Тиигхд Константин дала мөнг геев. Ода олн-зүсн мөнгнә халһар ору өгх зар хәләхш. Энүг талдан чин танһчин әмтн дөннжәнә. Мек-тах кедг улст эднә таньдг улс мелкгдснә тускар танһчин әмтн келж өгнә. Константин Гофтун келсәр, олн-зүсн зар һарч ирнә. Әмтн дала мөнг ахр болзгт шингәж авх саната. Зуг эннь мек-тах болжана.

Эн күүкнә келсәр, иим пирамидын тускар әмтн му гүмүд келнә. Дала күн мөнгән геенә. Иим пирамидт орх керг уга. Мөнгн бәәхлә иим пирамидт оршгов гиж эн күүкн келнә. Эн күүкд күүнә келсәр, үгмүд келж өгәд, нааднд орлцтн гисн бичг ирнә. Ода күртл иим бичг иржәнә. Аштнь мөнгн ирхш. Финансин пирамид иткжәхш. Эннь худл.

Финансин пирамид тогтадгд улсиг бәрж авсн бийнь, эмтн вэрәннь мөнгән мек-тах кедг улст оурлж өгнә. Түрүн авгтан иим финансин пирамидын бүрдәһәчнр әмтнд оруһин мөнг экләд өгнә. Иим кевәр эдн олн улсиг эврәннь кергтән орулж авна. Энүнәс иштә мөнгнә кемжән өснә. Болв энүнә хөөн пирамид хольврад унж одна. Зуг цөн әмтн эврәннь мөнгән хәрү некж авна. Ик зунь болхла мөнгән геенә. Психолог Шуурһч Цандыковин келсәр, ахр бодзгт ик ору шингәж авх улсиг иим кевәр меклнә. Көдлмш келго дала мөнг авх саната улс иим мек-тахд авлгдна.

Психолог Шуурһч Цандыкован келсәр, иим пирамидт әмтн оржахнь — өдгә цагин тогтсн экномическ бәәдл. Әмтн дала мөнг ахр болзгт олж авх саната. Пирамид тогтадг улс әмтнлә күүндж чадна, эднә итклд орад меклнә.

Иим финансин пирамидт эврән орсн цагт болн таньдг улсан, нәәжнрән, хамдан көдлжәх улсан орулсн цагт сәәнәр ухалад болһах кергтә.

Ээнән Ольга, Хавтхна Анатолий