Сурһульчнрин дунд болсн жанһрин байрт Элст балһсна болн танһчин арвн хойр района элчнр дөрлдв
Жанһрин байр хальмг улсин ик кезәнк цагас ирсн авьяс болжана. Чанһ-чиирг, эвтә довта залус бүс бәрлдж ноолддг бәәсмн, мөрнә урлданд орлцдг билә, саадгас тов халһна марһанд дииләчән йилһдг билә. Энүнд орлцхин төлә спортсменмүд ик эртәснь тохнята белдвр кенә. Сурһульчнрин дунд болсн жанһрин байрт Элст балһсна болн танһчин арвн хойр района элчнр дөрлдв. Жил ирвәс иим келн-улсин байр делгрлт авчана.
Арвн дөрвн наста Алдар Харцызов сурһульчнр дунд болсн жанһрин байрт түрүн болж орлцжана. Эн көвүн Целинн района командын ханьд дөрлдв. Нәәмн настадан түрүн болж бөк бәрлдлһнә дөрлдәнд чидлән сөрв. Эн саамд чанһ-чиирг болн чидлтә бөклә ноолдсн бийнь, диилвр бәрж чадв. Алдар Харцызовин келсәр, жанһрин марһан йир таасгдна. Иргчдән чигн бас иим нәр-нааднд орцлх санатав гиж Алдар келнә.
Жанһрин байрт хамгин чидлтә болн эвтә-довта сурһульчнр ирж дөрлдв. Танһчин бичкдүдин спортын школын директор Геннадий Левиновин келсәр, жанһрин нәр-наад бүрдәж давулһн өдгә цагт келн-улсин сойл, келн-улсин спорт хадһлж делгрүлһнд сән нилчән күргнә. Иим керг-үүлдврт бичкдүд орлцад, нәәжнрән олж авна, эрүл-дорул кевәр бәәхд сән урмд өгнә. Спортын школын директор Геннадий Левиновин келсәр, иим дөрлдәнд орлцад, бичкдүд жанһрин байрин, мана өвкнрин авьяс зангшалын тускар медж авна.
Тренермудын келсәр, жил ирвәс баһчуд иим дөрлдәнд олн баһчуд орлцж, эднд иим марһан ик чинр зүүдг болв. Кезәнк цагт хальмгуд арһмж, жид хайлһна, саадгас халһна дөрлдәнд орлхдан дурта бәәсмн. Өдгә цагин бичкдүд өвкнриннь үлдәсн мөнк зөөр хадһлж, делгрүлх саната. Улан залата хальмгуд дунд бүс бәрж бөк бәрлдлһн ик тоосмрта бәәсмн. Олн улс дунд бөкнр ик күндтә улс гиж тоолгддг билә. Марһанд диилвр бәрсн бөкнр үнтә белгән нерәддг билә, эднә тускар домг келдг бәәсмн.
Марһанд орлцсн улсин тоолврар, жанһрин нәр-наадн хальмг улсин күч-чидл үзүлж, уул авьяс сергәж босхлһнд ик тәвцән орулхнь лавта.
Ээнән Делгр, Колдан Церн
