“Сочи-2012” нертә нарта-делкән арвн негдгч инвестиционн форум болв
Краснодарск крайд “Сочи-2012” нертә нарта-делкән арвн негдгч инвестиционн форум болв. Тогстн авьясар энүнд Әрәәсн цуг гилтә регионмудын элчнр орлцв. Тер мет һазадын ордудын кесг орн-нутгин делегац нааран ирв. Хальмг танһчин делегациг Алексей Орлов һардв. Форумин һол төрнь — Әрәсән регионмудын экономикин делгрлт болн шин эв-арһд инвестиц орулһн болжана.
Форумин һол төрнь — Әрәсән экономикин инвестиционн болн инновационн делгрлт болжана. Энүнд хамгин ик оньг производствд, туризмин халхд, спортын обьектмуд тосхлһнд эзнә мөнг орулж авлһна төрт өггдв. Дмитрий Медведевин келсәр, Әрәсәд орж иржәх инвестицин кемжән жилдән далн жува долларт күрх зөвтә. Энүнә темдглсәр, давсн жилд эн кемжән тәвн һурвн жувад күрв. Тер мет Медведевин тоолврар, мана орн-нутгт бизнес күцәлһнә таал сольгдх зөвтә. Ода правительствин һол оньгт инфляцин кемжән бәәнә.
Сүл дөрвн жилин эргцд энүнә кемжән хойр холванд баһрв. Правительствин ахлачин тоолврар, ода Әрәсәд күн болһна туск зәнг электронн э-арһд орулх кергтә. Энүнд күн болһна экономическ чадмгин тускар бигдсн деерән талдан чигн зәнг орх. Эн төриг күцәх даалһвр өггдв. Хальмг танһч форумд өвәрц төсв бас орулж чадв. Сочи балһснд болсн ик хургин өмн сән зангшалд тохрсн өрүни хот хамдан уугдв. Әрәсән Сбербанкин һардач Герман Греф мана орн-нутгин регионмудын ахлачнрла харһлтс кев. Энүнд федеарльн цутхлнгин һардвр регионмудла яһж үүлдхин тускар тодрхаһар келгдв. Хальмг танһчин правительствин ахлач Людмила Иванован келсәр, танһчин делегац Италин, Австрин элчнрлә харһад күүндж. Турцин арһлачнрла бас харһлт болв. Мана танһч селәнә эдл-ахун регион болснас көлтә, һазадын ордудын арһлачнриг продукц эд-бод келһнә төр соньмсулжана. Мана танһчин малын махн Әрәсәд ода хамгин сән чинртәһинь эдн меднә.
Тер мет Хальмг танһч тәрлһ кедг өдгә цагин некврлә ирлцәтә шприц үзүлв. Иим зүүһәр өвдкүр угаһар тәрлһ кеж болх. Эннь медицинд шин эв-арһ болжана. Дәәкд болхла урһмл көрнг олзлад, экологин халхар цевр продукт кеж һарһлһна төсв олн улсин оньгт тусхагдв.
Латинск Америкас авч ирсн урһмл ода Хальмг теегт сәәнәр урһжана. Энүнд номтнр ик тәвцән орулв. Иим урһмлас шикрин ормдг гемтә улс олзлдг продукт кеж һарһгдна. Хальмг танһч эн форумд мах эд-бод кедг комплекс болн Хальмг танһчин аһуд салькна күчәр көдлдг систем үзүлв. Хальмг танһин толһач Алексей Орловин келсәр, эн хургт регионмудын төрт ик оньг тусхагдв. Әрәсән правительствин ахлач эн туст ик даалһвр өгв. Энүнә тоолврар, регионмудын һардлачнр бәәрн улсла өөрхн залһлда бәрж үүлдх зөвтә.
Сочи балһснд болсн нарта-делкән инвестиционн форум Әрәсән экономикд соньн болн олз-туста төсв өгв. Эн жил болсн ик хург бас сән үзмжтә болв гиж келх кергтә.
Дмитрий Ивахненко, Бадмаран Владислав
