Октябрьск район һучн тавн жилин өөн сергмжтәһәр темдглгдв

Хальмг танһчин зәрм райодт болн балһсд эврәннь өнчта өөнән темдглв. Тер тоод Октябрьск район йовна. Эн район тогтсна һучн тавн жилин өөн сергмжтәһәр темдглгдв. Хальмгин хамгин ар үзгт бәәх района делгрлтд ик тәвцән орулсн әмтн байрт орлцв. Ик нәр-нааднт энд болв.

Эн унтж кевтсн нилх көвүн ода эврәннь района туужд орсан меджәхш. Келхд, энүнә экнь бас минь эн өдр район тогтсна һучн тавн жил хооран төрж. Эннь бас эврә ччрта болжана. Района һучн тавн жилин туршарт олн ончта йовдлмуд учрсмн. Октябрьск РМО-н толһач Санл Адьяевин келсәр, туужин халх эргәд хәләхлә, района көгшүдин нүд үзхлә, һучн тавн гиснтн дегд ик болзг биш, туужин агчмин зуурин цаг болжана.

Байрин йовудт үг келсн улсин темдглсәр, Октябрьск районд эрдмән меддг болн көдлмшч улс дала. Эднә нилчәр района экономик делгрлт авчана, селәнә эдл-ахун, социальн халхәар болн баһ бизнесин туст сән хүврлт болжана. Зинаида Бурцева нааран хөрн жил хооран ирж көдлв. Давсн зун жилин далдгч жилдмүдт энд көдлсн улс амр биш таалд көдлв, тиигхд энд зуг бичкн селән билә, района шинкн көл деерән босжала. Талын һазрас ирсн хальмгин у —өргн тег үзчкәд, өврәд бәәв, темән тергәр йовх саам учрв, теегин кеермж болгч гөрәс болн сәәхн тоһрун шову һәәхдг бәәж. Района байрт энд кесг жилдән көдлж йовсн улс ирв, Зәрмнь минь одахн ачта амрлһнд һарв. Эдниг района һардвр медаляр ачлв. Тер тоод Хошуд селәнә бәәрн күүкд күн йовна.

Байрт орлцсн әмтн селән болһна тәвсн ишкә гермүдт орад, улан залата хальмугд яһж урдн бәәршлжэ йовсинь үзв. Эннь гиичнр ик өвәрц болв. Энүнд олн улсин хальмг зандн цәәһәр, амтта боорцгар тоов, селәнә эдл-ахун көдләчнрин урһаж авсн продукц әмтн амсв.

Тер мет энд селәнә эдл-ахун хот-хоолын яарм көдлв. Байрин пррограмма эн өдр Ик Царнг селәнә цутхлнгд олн-зүсн спортын марһас болв, тер тоод нертә бөк Сан Семенов ирәд, дамшлтарн хувалцв. Энд болсн байр дорас өсж йовх үйнр өвкнрин авьяс зангшалыг цаарандан делгрүлх ицл өгчәнә.

Ээнән Ольга, Очра Сергей