Шин бәәдл нертә Южненск СМО селәнүр хаалһ секгдв
Хальмг танһчин толһач көдлмшин кергәр Городовиковск районд одла. Энд байрин бәәдлд Шин бәәдл нертә Южненск СМО селәнүр хаалһ секгдсн билә. Энүнә төлә 14 шаху сай арслн өггдсн билә, тер тоод 1З сай 700 асрлн федеральн бюджетас ирсн билә. Алексей Орлов бәәрн әмтнлә харһв. Городовиковск цутхлнг талвнд балһсна 140 жилин өөнд нерәдгдсн байрт орлцв.
Иим ик чинртә байриг селәнә әмтн цуһар темдглв. Энүнд ик-баһ уга ирж орлцв. Нааран ирнс гиичнриг хуучн авьясар тосж авв. Күндтә гиичнр дунд Хальмг танһчин толһач Алексей Орлов ирв. Хол селәнд бәәх улсин төр хаһлснд бәәрн әмтн танһчин һардачд ик ханлтан өргжәнә. Эднә зовлнгнь — хату девскртә хаалһ бәәсмн. Ода нааран өдгә цагин некврлә ирлцәтә асфальтированн хаалһ ирв.
Энүг района байрин өмн өргнд эдлврт орулж. Хальмг танһчин толһач Алексей Орловин келсәр, тәвн өрк-бүл бәәршлжәх бичкн селәнд хаалһ ирснь йир сән керг болжана. Удл уга хату девскртә хаалһс цуг селәд поселкст күрхмн гиж Орлов темдглв.
Эн хаалһиг байрин бәәдлд секгдсн йовдл цуглрсн цуг улсиг байрлулв. Шин бәәдл бичкн селәнә туужд шин халх секгдв гиж келж болх. Энүнә тускар бәәрн улсиг ик бахмжтаһар келнә. Района делгрлтд ик тәвцән орулсн төләд күндлһнә һашгар ачлгдсн арһлач Ольга Абушинован келсәр, селәнә улст иим ик оньг өггджәхнь сән ашта болх. Эн күүкд күн хөрн жилдән крестьянск фермерск эдл-аху һарджала. Ачта амрлһнд һарсн хөөн, эдл-ахуг үрдүдтән үлдәв. Шин бәәдл селәнә күч-көлснә ветеран Ольга Абушинован келсәр, ода эдл-аху көл деерән босв. Зурһан үкр бәәнә, нәәмн толһа малын төль өсжәнә. Ода энд бәәж болх, газ, хаалһ, усн бәәнә.
Шин бәәдл поселкт урднь Ганжарихн өрк-бүләрн Сергей Алексеевич болн Галина Ивановна бәәршлжәсмн. Шин хаалһ секх зәнг эдн бас сонсв. Тегәд урднь хамдан бәәжәсн улсин байр хувалцхар ирж. Эднә келсәр, урднь нааран бальчгт ирдг арһ уга билә, ода болхла йир сән болв.
Городовиковск РМО-н толһач Сергей Манжиковин келсәр, района аһуд селәд хоорндк хаалһс цаарандан чигн тосхгдхмн. Энүнә темдглсәр, энүнә төлә бюджетд мөнг орулгдх. һурвн жил болда цуг селәдт иим хаалһ тосхгдх.
Эн саамд района цутхлнг селәнд ик нәр-наадн болв. Эн өдр балһсна әмтн зун дөчн жилимн ончта өөнән темдглв. Урднь Городовиковск балһсна бәәрнд бичкн селән бәәж. Энүн Ик Дөрвдә нойн Михаил Гахаев тогтасмн. Энд Гахаевин седвәрәр тоосхар түрүн гермүд бәргдж. Нойна ставкин хамгин сәәхн кеерүлнь — бәәрн хурлын гер бәәсмн. Ода зәрм хуучн гермүд ода күртл бәәнә. Башнт селәг тогтасн күүнә нерн туужд мөнкинд үлдхнь лавта. Бәәрн музей жил болһн шин экспонатар дүүрнә. Ода болхла Городовиковск өдгәц агин некврлә ирлцәтә балһсн. Энүнд арвн зурһан минһн күн бәәнә. Сурһулин кесг учреждень, баһчудын цутхлнг үүлджәнә.
Чучян Валентина, Котина Валерий
