Роликин конькиһар дошлһна марһан үвләр болв
Үвлин кемд зунын марһан болв. Элст балһснд түрүн болж роликин конькиһар дошлһна дөрлдән болв. Энүнд бичкдүд болн бөдүн улс чигн орлцад, чидлән сөрв. Эднә тоолврар, иим соньн марһан цогц-махм уд чанһаж, цевр аһар кииләд, чеежин сергжм өгнә.
Дөрлдәнд зәрм орлцачнр уйн наста болв чигниим марһаг йоста ик чинртх дөрлдән гиж тоолв. Иим марһана йовудт зуг хоосн конькиһар дошсн деерән, чик техник үзүлх кергтә, олн-үзсн эв-арһар зогсх, эргх зөвтә. Тегәд чигн дөрлдәнә өмн бичкдүд невчк үүмәд бәәв. Тер бийнь түргн дошх күцл дииләд, эдн шунмһа кеәвр дөрлдв. Роликар дошхдан йир дуртав. Нәәжнртәһән цуглрад, хамдан дошнавидн. Роликин конькиһар биилдг дасв. Иим эв-арһ күнд болна.
Марһана хамгин бичкн орлцач Алина зуг тавн наста. Нег жил хоорна түрүн болож роликин конькиһар дошдг дасж авла. Энүнд эцкнь сән дөн болад, чикхәр дошдг дасхж. Келхд, эцкнь бас иим дөрлдәнд орлцв. Максим Сикоренко тоолврар, иим дөрлдән йир олз-туста. Иим кевәр бичкдүд цогц-махмудан батрулна, өрк-бүләрн амрхд сән таал бүрдәнә. Максим Сикоренко келсәр, спорт болһн олз-туста болна. Зәрм әмтн нааднд дурлад, спортд сул цага өгнә. Иим марһан өрк-бүләрн сәәнәр амрхд ик тусан күргнә.
Дөрлдәнә бүрдәһәчнрин келсәр, роликин конькиһар дошхин төлә шишлнг белдвр керг уга, спортын дамшлт чигн угаһар дошж болх. Марһан наадна янзтаһар бүрдәж давулгдв. Дөрлдәнә орлцачнр командар хувагдж чидлән сөрв. Эдн хамгин хурднан йилһж авв. Зуг иим марһанд цуг орлцачнр әәмшг угаһар дөрлдж шав авшгон төләд бүрдәһәчнр зүткв. Марһана бүрдәһәч Владимир Омельчак келсәр, иим керг-үүлдврин йовудт баһчуд сул цаган олз-тустаһар давулна. Ке-сәәхн спорт. Әмтн цогц-махмудан батрулна, нег үлү иим спорт бичкдүдт тааста болна.
Шин жилин байрин өдрмүдт баһчуд эврәннь дамшлтан болн эв-арһар үзүлх арһ учрв. Тер мет эдн эврәннь өөрхн улслаһан хамдан сул цаган сергмжтәһәр давулж чадв. Эн жилин марһанд орлцсн әмтн иргч жилд эрк биш иим дөрлдәнд орлцхан медүлв. Иргчдән дамшлтан өөдлүләд, конькиһар дошдг соньн эв-арh үзүлх саната.
Ээнән Делгр, Настан Сергей
