Танһчин толһачин байрин елк Элст балһснд болв

Шин жилин байрт хамгин түрүнд бичкдүд икәр байрлна. Жил болһюн эдндл Хальмг танһчин толһач елкин байр бүрдәж ик байр үүдәнә.

Бичкдүдин үүдәлтин цутхлнгин үүд секхлә, туульд туссн болж медгднә. Бичкн көвүд-күүкдиг болн эк-эцкнриг туульсин персонажмуд тосч авв. Эн өдр зуг артистнр биш, ирсн сурһульчнр ке-сәәхн костюмта ирв.

Фойед болхла сәәхн наадһасар кеерүлгдсн, олн-зүсн шамар гилвксн өндр һацур бичкдүдиг күләжәж. 4 метр өндртән һацуриг йиртмжин көрнгин министерствин специалистнр Городовиковск балһснас авч ирв. Көвүд-күүкд болн туульсин дүрмүд энүг эргәд, тогтсн авьясар шин жилин ду дуулв. Мегамозгин, роботин болн нань талдан костюмс бичкдүдт йир таасгдв.

Эн жил танһчин шин жилин нәәрт цуг райодын сурһульчнр орлцв. Январь сарин 7 күртл күүкд-көвүд Киитн Аавла болн Цасн күүкнлә шин жилин байр темдгләд, белгүд авцхав. Ирсн бичкдүдиг танһчин толһач Алексей Орлов йөрәһәд, эрүл-менд болн сансн санань күцтхә гиж дурдв.

Эн ик нәәрт әмтн урдаснь белдвр кенә. Жанна Абдуллина үрдүдтәһән шин жилин байрт ямаран костюм өмсхин тускар намрар ухалсн бәәж.

Нәр-наадыг драмин болн шог наадна орс театрин артистнр белдв. Эн сәәхн, сергмжтә байриг бичкдүд кесгтән мартшго.

Гүзәлән Татьяна, Ирчин Алексей