Насни дигт күрәд уга бичкдүдин комиссь бүртклһнә көдлмш күцәв
Эндр насни дигт күрәд уга бичкдүдин комиссь бүртклһнә көдлмш күцәв. Кесг дәкж зака эвдсн йовдлмуд һарһсн эк-эцкнриг болн көвүд-күүкдиг шалһв. Тиим өрк-бүлмүд шишлн учетд бәәнә. Эднлә дангин профилактическ күүндвр тогтана. Специалистнр бичкдүд ямаран таалд бәәхнь хәләв.
Зурһан хайг спискд бәәнә. Насна дигт күрәд уга бичкдүдин кергүдәр үүлддг комиссин тоод бәәх өрк-бүл эдн ирхнь медхш, тегәд эднә икнкь гертән уга болж һарв. Герин өөр тәмкин үлдл, хоосн шилмүд энд-тенд кевтсн үзгднә. Иим бәәдл эднә патьрт бас үзж болхмн. Энд бәәх улсла комиссин көдләчнр күүндвр тогтав.
Бичкдүд альд бәәхнь медгджәхш. Күүндврин йовудт эн хойр күн бичкдүд кедү нас күрснь, альд сурһуль сурчахнь медхш. Тегәд эднд нөкд болхин төлә насна дигт күрәд уга бичкдүдин кергүдәр үүлддг комиссь болн опекин органмуд эднлә шишлн көдлмш давулна. Му үлгүр болжах элгн-саднас эдн бичкдүдиг харсж, дөн күргнә. Эндр административн зөв эвдсн кодексла һучн тавдгч пунктын тавдгч статьла ирлцүлж протокол бичгдв. Тегәд удл уга эдн эк-эцкин зөвән геехмн. Йириндән комиссин гешүд бичкдүдин зөвнь харсж эдн өрк-бүлдән бәәх арһ хәәнә.
Комиссин ах специалист Татьяна Аляшеван келсәр, иим бәәдлд туссн өрк-бүлмүд чикртхә гиж арһ өгнәвидн. Зәрм эк-эцкнр үрдүдиннь тускар ухаллго әрк болн наркотикд авлгдна.
Эндр өдр хойр күүкд күн эврәннь һарһсн гемән медәд, ода эврәннь бичкдүдән хәрү гер талан авхар зүткжәнә. Рейдин йовудт Кожановихна өрк-бүлд одвидн. Эдн зурһан көвүд-күүкдиг өскжәнә. Нидн жил олн үртә эк эк-эцкин зөвән геев. Цаг зуур давад эн күүкд күн бийән һартан авад, әркән хаяд, чикрв.
Любовь Коржановин келсәр, икәр әрк-чаһр уудн угав. Невчк пиив уухла, хам-хоша бәәх әмтн тер дарунь килмжин органмудт жиннүләд, хов зөөнә. Үлү үзжәх бәәдлтә.
Эн күүкд күүнә болн талдан иим бәәдлд туссн өрк-бүлмүд түрн болж эврәннь күүкдиннь тускар ухалж килмжән өгх гиж нәәлжәнәвидн. Эн гергн герин эзән гееһәд тавн үрдүднь пеньс авна, һурвн күн инвалидн пеньсәр теткгднә. Келхд, сар болһн авдг мөнгн му биш һарна. Мөнгнә төлә биш күүкдинь арһинь хәәж эднән хәрү герталан авв гиж тоолжанавидн. Темдгләд келхд иим рейдмуд сән аш үзүлж нилчән күргнә.
Азыда Надежда, Хулхачин Николай
