Эн жиләс авн 1-гч классин сурһульчнр герин өөр бәәх школмудт орх санаһан медүлх зөвтә
Эн жиләс авн негдгч классин сурһульчнр герин өөр бәәх школмудт орх санаһан медүлх зөвтә. Шин закаһар эрдм-сурһулин заведенин өөр бәәдг негдгч класст оржах көвүд-күүкд хамгин түрүнд эн школд сурх зөвтә. Талдан райодт бәәх школмудт бичкдүдән өгх саната эц-эцкнр яһж бәәхмб?
Герин өөр бәәх школд негдгч классин сурһульчнр йовхла хаалһд цаган үрәшго болсн деерән, әәмшг уга бәәлһн теткгдхмн. Элстин бәәрн күн Анна Мацакова эн туст талдан ухан-тоолврта бәәнә.
Энүнә келсәр, Тамара Хахлынован нертә уульцд өрк-бүл бәәнә. Тегәд эднә бичкдүд һурвдгч тойгта школд сурһуль сурх зөвтә. Зуг көвүһән келн-улсин гимназьд орулх саната. Юнгад гихлә, энүнә тоолврар, тенд дамшлта багшнр көдлнә.
Шүүж авсн школд эс гиж гимназьд бичкдүдән орулж болжана кемржән эн сурһулин заведеньд орм үлдхлә. Юнгад гихлә түрүн болж герин өөр бәәх школд энд бәәх көвүд-күүкд сурһуль сурх зөвтә. Орм бәәх аль угай августин эклцәр медгдх. Дөврдгч тойгта школын директор Марина Цадырован келсәр, кесг сар урдас негдгч класст сурх бичкдүдин то темдглж бичж авгдна. Марина Цадырован келсәр, школд зун орм бәәнә. Эндр өдр кесн то-дигәр зун күн эрлһ орулж өгв.
Школ, гимназь болһн шишлн уульнцла болн гермүдлә залһлдата. Тегәд балһсна цутхлнгд бәәх бичкдүд Згч, 4гч болн келн-улсин гимназьд сурхмн. Элстин ар үзгин негдгч классин сурһульчнр болхла 21гч, 12гч, классическ гимназьд орх зөвтә. 6гч, 7гч, 8гч, болн 9гч микрорайодын бәәрн улс 17гч, 18гч, 20гч тойгта школмудт болн олн-халхта гимназьд сурһулян сурх. Балһсна деед үзгт, 1гч микрорайона, Хомутниковин болн 8-ое марта нертә уульнцд 10гч, 8гч, 2Згч болн 2гч тойгта школмуд бәәнә. Чонжин өөр, Радонежкийин, Кирбазарная, Автомобилистов, Номинханова нертә уульцнд негхн Сергий Радонежскийин нертә гимназь бәәнә.
Профильн ведомствин специалистнрин келсәр, эн туст олн-зүсн йовдлмуд харһад чигн бәәх. Үлгүрлхд, негдгч класст орх көвүд-күүкд темдглж бичгдсн хайгар бәәлго талдан райодт бәәнә. Дәкәд болхла, өрк-бүлин хайг талдан чигн балһснд бичгднә.
Тегәд эрдм-сурһулин заллт иим харһдг төриг шишлн кевәр хәләгдх.
Эн жил профильн ведомствин кесн то-дигәр нег минһн зун күн негдгч класст орхмн. Тер хоорнд балһсна школмудт нәәмн зун эрлһ орулж өггдв. Элст балһсна эрдм-сурһулин заллтин һардачнр келсәр, цуһараднь орм күрдх.
Санкун Кермен, Хулхачин Николай
