Маршрутн автобусмудт ГЛОНАСС болн тахограф углж тәвгдх зөвтә
Апрелин нег шинәс авн әмт зөөдг автомобильмдт эрк биш тахограф болн ГЛОНАСС систем углж тәвгдх зөвтә. Энүнә тускар федеральн закан батлж авгдв. Шин закаһар юридическ әмтн болн онц арһлачнр эврәннь көлгн-күчән бүртклһнә техническ эв-арһар теткх зөвтә.
Ода деерән маршрутн автобусмудын жолачнр ГЛОНАССин оборудовань болн тахограф углж тәвхәдән адһжахш. Балһсд хоорнд йовдг автобусмудын жолачнр болхла иим оборудовань углж тәвжәнә. Хальмг танһчин тосхлтын, көлгн-күчнә болн хаалһин эдл-ахун министрин дарук Юрий Ользеевин келсәр, хол һазрт йовдг автобусмудын ик зунь бүртклһнә эв-арһар теткгдв. Николай Богославский әмт зөөдг халхар кесг жилдән көдлжәнә. Энүнә келсәр, бүртклһнә шин систем олзлхла хаалһст әәмшг уга йовлһна бәәдл сән халхднь ясрх. Болв иим оборудвань эврәннь мөнгәр хулдж авхд унтә болна. Нег үлү иим систем эвдрхлә, ясвр кехин төлә дала мөнгн һарх.
Мана маршрутд һучн зурһан автобус көдлжәнә. Эднс нег чигн машинд ГЛОНАСС болн тахограф углж тәвгдәд уга. Эннь арһлачнрт дегд үнтә болжана. Ода маршрутн автобусар йовлһан үн зун арвн арслнг күрчәнә. Кемр иим систем далн минһн арслнг күрхлә, дегд үнтә болжана. Ода арһлачнр автобусмудан хулджана.
Специалистнрин келсәр, тахограф углж тәвхлә, хаалһст әәмшг уга йовлһна бәәдл зөвәр икәр ясрна. Иим системин нилчәр күч-көлснә диг-дара күцәж болна, жолачнр цаглань амрна, талдан чигн таал маши залачнрт бүрдәгднә. Ахрар келхд, көлгн-күчнә эв-арһин көдлмшиг ямаран чигн цагт бүрткж хәләж болх. Танһчин автомобильн маршрутмудт ГЛОНАСС системин спутникин навигационн эв-арһ олзлһна төлә Хальмг танһчин правительств һаруһин кемжәг дөчн нәәмн процентд икдүлх шиидвр авв. Танһчин көлгн-күчнә министрин дарук Юрий Ользеевин келсәр, иим систем углж тәвлһнә һол күцлнь — жолачнрин көдлмшин цаг бүрткх төр тәвгджәнә. Маши залачнр цаглань көдләд, цаглань амрх зөвтә. Темдглсн цагт машиһан зогсаһад амрх зөвтә эс гиж машина техническ хәләвр кех зөвтә.
Иим приборин нилчәр өдгә цагт ямаран маршрутн автобус альд йовхин тускар медж авч болх. Тер мет автобус болһнд бачм чинртә бәәдлд докья өгдг кнопк бәәнә. Энүнә дөнгәр хаалһд зеткртә йовдлас гетлүлж болх. Кемр иим оборудовань арһлачнр эс углж тәвхлә, эдн ялд унхә эс гиж әмт зөөдг зөвшәл уга болх. Ода статистикин то-дигәр маршрутн автобусмудын арһлачнр орлцата хаалһд зеткртә йовдлмудын то өсәд йовна.
Ээнән Ольга, Настан Сергей
