Әәдрхнә зурачин һәәхүл келн-улсин музейд секгдв
Пальмовин нертә келн-улсин музейд Әәдрхнә зурач Валерий Малеевин үүдәврмүдин Этюд нертә художествен һәәхүл секгдв. Энүнд танһчин әмтн далвн тавн зургуд һәәхж чадх, эднәс далн негн зург болн дөрвн скульптурн үүдәвр тәвгдв.
Тосна ширәр зурсн зургуд болн шаврас үүдәсн Валерий Малеевин көдлмш хәләсн әмтн кесгтән зогсж хәләнә. Энүнд чонжин куполмуд, Әрәсән дунд үзгин модна хамтхас, түргн урсхлта һол дамжулж тәвсн тагтмуд болн Кавказин уулын цасар бүркгдсн ора үзж болна.
Йиртмжин зург болһн эврәннь ке-сәәхн төрскн һазртан дуран медүлһнә герч болжана. Берк зурач иим кевәр йиртмжи бәәдл зурж үзүлж чадна. СНХ Әрәсән зурачнрин ниицәнә гешүн Степан Ботиевин келсәр, зурачин көдлмшт йирмжин бәәдл онц орм эзлнә. Йиртмжин ке-сәәхниг хәләһәчнрт медүлж үзүлнә.
Валерий Малеевин үүдәлтд йиртмжин зургуд һол орм эзлжәнә. Эргндк аһуг цуг халхаснь үзүлхәр зүткнә. Иим дамшлтан бичкдүдт өгчәнә. Чонкушовин нертә Элст балһсна искусствин училишин һурвдгч курсын оютн Татьяна Убушаеван келсәр, хамгин түрүнд зурачин тосна ширәр зурсн зургуд таасгдна.
Зурач Валерий Малеев көдлмшәсн сул цагтан зург зурна. Ода Әрәсән хамгин хуучн Власовин нертә Астраханск художественн училишин директор болж көдлжәнә. Энүг эврән найн йисдгч жилд төгсәлә. Онц келхд, энд билгтә орсин зурач, әмтнә зургуд йилһән сәәнәр зурдг, дегтрмүд зургудар кеерүлдг эрдмч болн театрин декоратор Борис Кустодиев сурһуль сурсн билә. Тер мет эн училишиг Хальмг танһчин нертә үүлдәчнр Валерий Монтышев, Николай Шиняев, Юрий Хаджинов болн талдан чигн зурачнр төгсәсмн. Училиш төгсәснә хөөн тер дарунь Валерий Малеев энд экләд багшлв. Ода багшин көдлмш энүнә жирһлин һол кергт хүврв. Энүнә келсәр, эврәннь хоршасн үүдәвлтин көдлмшин дамшлтыг баһ наста зурачнрт өгхәр шунжана. Әрәсән искусствин хамгин сән зангшалыг баһчудт күргж медүлх саната. Зурач Валерий Малеевин келсәр, хамгин һол төрнь —бичкдүдт онц оньг тусхалһн болжана. Тегәд эн һәәхүлин бичкн көвүд-күүкдин төлә авч ирж.
Эндр өдрт педагогическ номин кандидат Валерий Малеев билгтә һардач болн шунмһа бүрдәһәч гиж бийән үзүлв. Тер бийнь дурта эрдмдән сул цаг олж авна. Зурач Малеевин келсәр, Әрәсән йиртмж ке-сәәхн болн олн-зүсн чинртә. Ода деерән зурачин үүдәврмүд дунд у-өргн хальмгин теегин зургуд уга.
Хавтхна Элла, Ирчин Алексей
