Лаганск районд бичкдүдин лагерь шинәс экләд көдлжәнә

“Салют” нертә бичкдүдин лагериг хойр жилин завсрин хөөн Лаганя района администрац секх шиидвр авсмн. Эн зунар түрүн селгәнд бәәрн района бичкдүдлә хамдан хам хоша бәәх Хар hазра района көвүд-күүкд бас эрүл-мендән батрулв.

Лаганя балһснас хол биш “Салют” лагерь бәәнә. Энд бичкдүд өрүн болһн иим кевәр зергләнд зогсна.

Энд амрчах көвүд-күүкд спортын плошадкд болн талдан чигн нааддг һазрт сул цагаг олз-тустаһар давулжана. Санл Минькеев энд олн нәәжнрән олж авч. Нег үлү лагерьт ода хамгин дурта шатр наадан мартлго, чидлән талдан көвүдг-күүкдлә сөржәнә. Санл Минькеевин келсәр, лагерьт йир сән кевәр амрчана. Футболын марһанд бас орлцж чадв.

Лагерьт көдлжәх багшнр соньн зура белдж, сурһульчнр сәәнәр амрхин төлә цуг таал бүрдәв. Лагерин директор Игорь Евиновин келсәр, зунын кемд лагерь көдлхд ик белдвр кегдв. Бичкдүдин төлә бүкл программ белдсн бәәж. Өдр болһн энд соньн керг-үүлдврмүд бәрдәгдж давулгдна. Марһан болһна хөөн дииләчнр үнтә мөрә авна.

Болв хамгин икәр бичкдүд һолд өөмхдән дурта. Ода сурһульчнр шишлнг темдглсн һазрт өөмжәнә. Снежана Галкина келсәр, энд цогц махмудан батрулж, сул цаган сергәмжтәһәр давулжана. Кесг нәәжнртә болв, нам эндәс гер талан хәрхд дурлжахш.

Иим сән кевәр амрлһ бүрдәхд района һардачнр болн багшн ик дөн болв. Тегәд чигн эднә көдлмшин ашнь сән болжана. Ах вожатая Светлана Кутыгина келсәр, зунын кемд энд бичкдүд сәәнәр амрчана. Салют лагерь шинәс экләд көдлжәхнь йир сән керг уга. Лагерь көдлжәхд сурһульчнр болн эк-эцкнр ик байрта.

Зунын кемд эн лагерьт дәкәд хойр селгәнд бичкдүд ирж амрх. Ут-тоодан энд һурвн зун көвүд-күүкд амрх.

Харлун Бадма, Хавтхна Анатолий