Уснд өөмәд, күн ямаран учрар әмнәсн хаһцсн тускар гүн шинжлт мана танһчд кеж болжахш
Зунын догшн халунд зәрм улс боодгудт болн һолмудт өөмәд, сергнә. Болв иим кемд зәрм әмтн саг кевәр өөмлго, усн яһж өөмхин зокал мартна. Талдан улс болхла эжго һазрт өөмнә. Тегәд чигн зәрмдәән зеткртә йовдлмуд учнра. Уснд өөмәд, ямаран учрар күн өнгрсинь медж авхд дегд күнд болна.
Эндр өдрт Хальмг танһчин аһуд уснд хойр күн әмнәсн хаһцв. Баһ кемжәтә кермсәр үүлджәх государственн инспекцин көдләчнрин келсәр, уснд өөмсн кемд эдн өнгрж. Баһ наста әмтн саг угаһар уснд орж өөмнә. Хальмг танһчар ГИМС-ин әнгин ах государственн инспектор Сергей Казимировин келсәр, Сарпинск районд боодгт нег күүкн уснд өөмәд, әмнәсн хаһцв. Тер мет элст балһснд колонск боодгт бас нег күүкд күн өнгрж.
Хальмгин эмчнрин келсәр, уснд өрад әмнәсн хаһцсн улс ямаран учрар өнгрсинь ахр болзгт медж авхд күнд. Юнгад гихлә, зарһин болн медицинск шинжлт кедг танһчин бюрод иим шинжлт кедг шишлн оборудовань уга. Иим аппарат бәәсн болхла, усн орад өөмсн күн ямаран учрар өнгрснь медж авхд амр бәәсмн. Нег үлү, энүг уснд хаяд алсинь бас медж болх билә. Заһрин болн медицинск шинжлтын бюрон әнгин аһрлач Николай Авдеевин келсәр, әрк ууһад, наркотик олзлад, уснд әмнәсн хаһцсн улсиг шинжлж болна. Талдан учринь медж авдг арһ уга.
Энд бәәх шишлнг оборудовань дөрвн жил хооран хамхрв. Талдан оборудовань хуучрад, уд луга хамрх әәмшгтә. Тегәд чигн уснд ямаран учра күн өнгрснә тускр медж авхин төлә шинжлтиг талын һазрт кех кергтә болна. Талдан балһсдт иим лабораторь көдлнә. Зуг иим шинжлт йир үнтә. Элст балһснд гистологин энг бәәнә. Энд кергтә шинжлт кеж болх билә. Болв иим оборудованяр ямаран учрар уснд күн өнргснтускар йосндан медж авч болхш. Хальмгин СМО-н энгин һарлач Галина Доренкон келсәр, иим шинжлтыг дег нәрн кеәвр кех кергтә. Тегәд мана әнгд иим нәрн шинжлт кеж болжахш. Юнгад гихлә, оборудовань дегд хуучн.
Иим хурц төрин тускар танһчин эмчнр кесг жилдән келж медүлжәнә. Одахн Цаһан Амнд нег бичкн күн геедрәд, энүг өнгрсинь бузр һазрт олж авч. Тегәд ямаран учрар эн бичкн күн өнргснә тускар медж авхин төлә шишлнг шинжлт Әәдрхн балһснд йовулгдна.
Азыда Надежда, Жамбин Дмитрий
