Көтчнрә района Алцнһуд селәнд шин фельдшерск пункт байрин бәәдлд секгдв

Көтчнрә района Алцнһуд селәнд шин фельдшерск пункт байрин бәәдлд секгдв. Удл уга энүнд эмнүл авч болх. Лабораторьт болн тәрлһ кедг кабинетд өдгә цагин некврлә ирлцәтә оборудовань углж тәвгдв. Өдрә стационарт сарул болн дулан. Шин гер бәрхин төлә селәнә социальн делгрлтин федеральн программар арвн сай арслнг йилһж өггдв. Бәәрн бюджет болхла медицинск оборудовань хулдж авхин төлә күсдундур сай арслнг өгв.

Хальмг танһчин багшнр төрскн келнә, тер тоод орс келнә цугәрәсән мастер-класст диилвр бәрв. Арвн тавдгч школын багш Алия Басхаева региональн марһана ашар хальмг танһчин хамгин сән багшин нер зүүсн билә. Цугәрәсән дөрлдәнд төрскн келнә номинацд түрүн орм эзлв. Элстин лицейд багшлжах Елена Манджиева эврәннь көдлмштән келн-улсин чинр олзлжана. Ода Әрәсән хамгин сән багшин тоод орв. Москва балһснд болсн дөрлдәнд Хамгин сән багш-шинжләчин нер зүүв. Хальмг танһчин эрдм-сурһулин, сойлын болн номин министрин дарук Раиса Дякиеван зәнглсәр, Багшин гер нертә программар Элст балһснд олн патьрта хойр гер экләд тосхгдх. Патьрин дөрвлжн метрнь тогтсн үнәс кимд болх. Нег үлү, ямаран чигн жалв авчах багшнр патьр авхин төлә эрлһ орулж өгч чаджана.