Зунын кемд дачд күрхд амр биш
Зунын кемд олн әмтн дачдан одад, көдләд, сул цаган олз-тустаһар давулна. Цевр аһар кииләд, һаза көдләд, седклән амрана. Болв дачд күрхд халун кемд амр биш. Зәрм дачн участкмудт автобус мууһар йовна, зәрм һазрт әмтн йовһар күрнә. Тегәд чигн кесг әмтн даачан хаяд, һазрт тәрә темс урһажахш.
Троицкое селәнәс зөвәр уужм һазрт бәәх дачн поселкас Анна Батерикова йовһар көдлмштән күрнә. Энд автобус йовхш. Тегәд чигн эн күүкд күн өдр болн кесг дуунад йовһар йовна. Анна Батерикован келсәр, бальчгта кемд теегәр йовхд күнд болна. Асфальтар йовх кергә. Эннь хол. Болв дачд ирәд көдлхлә, седкл амрна. Ода зәрм әмтн эврә машин уга.
Һурвн наста көвүтә Мадина Деналбекован келсәр, зунын кемд дачмудт бичкдүд болн пенсионермуд олар ирнә, тер мет үвлин кемд дачд бас дала күн ирнә. Автобус уга болад, эдн Троицкое селәнд нүүх кергтә болв гиж Мадина келнә. Ода дачн поселкдмудт энүнә эк-эцкнь үлдв. Дулан цагт эдн тал йовһар күрнә, бильчгта цагт болн киитн болхла, йовдсн маши күләнә. Мадина Деналбекован келсәр, бичкдүд эндәс школд одна. Хур орхла, эднд му болна.
Элст балсһнас деед-ар үзгт бәәх дачмуд күртл автобус өдр болһн йовжана. Балһснас эн дачмуд һурвн дундур дуунад бәәнә. Зуг сарнг өдр автобусин залач амрна. Евгений Бадмаевин келсәр, энд машид йовна. “ГАЗеляс” бууһад, йовһар нааран ирж.
Олна көлгн-күчн дачмудт завср угаһар йовхин туск шиидвр хотл балһсна һардачнр батлж авх гиж жолач Евгений нәәлжәнә. Юнгад гихлә, автобус эс йовснас көлтә кесг әмтн дачмудан хайчкв. Элст балсһна мэрийн тосхлтын, промышленностин болн залһлдан төрмүдин әнгин көдләч Мацг Малыковин келсәр, ода “ПАЗ” автобус дачн участкмудын районд өдрт тав дәкж, өрүн доланас авн хөрн час күртл йовжана.
Автобуст хөрн тавн күн йовж чадх. Элстин мэрийн көдләч Мацг Малыковин цәәлһсәр, бембә болн нарн өдрмүдт немр автобусмуд арвн негн часас авн йовна. Элстин деед-ар үзгин дачмудт әмт зөөхин төлә олн улс зөөдг шин автобус хулдж авх зура хотл балһсна һардачнр темдглж авсмн.
Дачн автобусин жолач Владимир Болдырев тавн жилдән эн маршрутд көдлжәнә. Көдлмш таасгдна, дачмудыг цугтаһинь гилтә сәәнәр таньдг болв гиж эн келнә. Автобус темдглсн болзгтан һарч йовна. Тегәд әмтн урдаснь цаган медәд, күләнә. Иим автобус йовснд эдн ик байрта бәәнә.
Ээнән Делгр, Очра Сергей
