Улан Эрг поселкд бичкдүдин сад секгдх

Эн долан хонгт бичкдүдин төлә сурһулин жил эклх. Яшкульск района Улан Эрг поселкин хөрн тавн бичкн көвүн-күүкн болн эднә эк-эцкнр бичкдүдин сад секхинь күләжәнә. Энд көдлжәсн дошкольн учреждениг йирдгч жилмүдт хаав. Тер цагас авн бәәрн әмтн бичкүдин сад секхинь күләжәнә. Зуг хөрн жил болад дошкольн учрежеднь секгдх. Садын көдләчнр көдлмшт белн.

Иим кевәр асхн болһн көдлмшин хөөн Анна Цебекова бичкдүдтәһән сурһуль дасна. Ууһн күүкн Арлтана негдгч класст орв, ода отхн Айланаг школд белдх кергтә. Поселкд бичкдүдин сад уга. Дошкольн учреждень йирдгч жилмүдт хаагдв. Энүнә гериг хамхлад, цуцад авчкв. Эн төриг селәнә улс ахлачнрт оньдин босхна. Яшкульск районд танһчин толһач көдлмшин кергәр ирсн цагт селәнә улс энүнә тускар келсн билә. Тиигхд дошкольн учрежденя төлә гер олж авх даалһвр района администрацд өггдв. Ода болхла эн төр хаһлгдв гиж келж болх. Анна Цебекован келсәр, Улан Эрг поселкд бичкдүдин сад удл уга секгдх зөвтә. Энүг бәәрн улс тенкән уга гидгәр күләжәнә.

Улан Эрг поселкин бәәрн күүкд күн Анна Цебекован келсәр, поселкин улст ик байр болжана. Удл уга дошкольн учреждень секгдх. Отхн күүкнь садт орх. Цуг кергтә документ орулж өгв. Сад секхинь ик кезәнәс авн күләжәнә.

Мана үүдәгч баг бәәрн школд одв. Хойр давхрта герт ода йирн һурвн сурһульч сурчана. Школын гер тавн зун көвүд-күүкдин төлә тосхгдв. Тегәд сул ормиг бичкдүдин садт өгхәр шиидв. Энүнә төлә мөнг йилһж өгсн мөнгәр дошкольн учрежденя гер шинрүлж ясгдв.

Улан Эрг селәнә муниципальн бүрдәцин ахлач Бадма Джаднаевин келсәр, района муниципальн эрдм-сурһулин әнг амр биш төр хаһлжана. Бичкдүдин сад секхин төлә нег сай долан зун минһн арслнг йилһж өгв. Керг эклхд амр биш. Энд көдлх улсиг хәәж авх кергтә, шин оборудовань хулдж авх төр тәвгдв. Герт ясврин көдлмш кегдв.

Цөн өдр болад дошкольн учрежденя өөр наадлһан плошадк кеерүлгдх. Тиигхлә бичкдүдин сад бүклдән эдлврт орхдан белн болх. Садын коллектви ода чигн экләд көдлхдән белн бәәнә. Шинрүлгдсн садт хөрн тавн көвүн-күүкн орх. Дошкольн учрежденя һардач Екатерина Очирован келсәр, коллективин ханьд сурһмжлачнр, медицинск көдләч, техническ персонал болн повар бәәнә.

Бичкдүдин садын һардач Екатерина Очирован келсәр, школд эврә хот кедг һазр бәәнә. Тенд повар бичкдүдт хот кех. Көвүд-күүкд энд хот уух. Хот кедг шишлнг оборудовань бәәнә. Көдлмшт цугнь белн.

Улан Эрг поселкд шинрүлгдсн сад эдлврт орхла дошкольн учрежденьд орх бичкдүдин чеерүд хөрн тавн күүнд баһрх. Эннь давсн жиләс хойр холванд ик болжана. Эннь Яшкульск районд дошкольн эрдм-сурһулин делрглт нертә программин нилчәр күцәгджәнә.

Яшкульск РМО-н администрацин толаһчин дарук Елена Устиеван келсәр, эн программар Уттинск селәнә муниципальн бүрдәцд иим төр хаһлх кергтә. Иргч жилд шин дошкольн учреждень селәнд секх зура бәәнә. Энүнд тәвн көвүн-күүкн орж чадх. Ода районд тавн зун һучн дөрвн бичкдүд садт оржана. Удл уга Улан Эрг поселкд Родничок нертә сад көдлх. Бичкдүдин садмуд секлһнә төлх көдлмш кегджәнә.

Улан Эрг поселкд бичкдүдин сад удл уга секгдх. Айлана Цебекова болн талдан чигн бичкдүд ик байрта бәәнә. Тер мет эднә эк-эцкнр бас байрлжана.

Чучян Валентина, Ирчин Алексей