Хальмгин театр диилвр бәрв
Драмин болн шог наадна орсин театр диилвр бәрәд Элст балһснд хәрж ирв. Новочеркасск балһснд болсн Комплимент нертә тавдчг нарта-делкән театральн фестивальд театрин ах режиссер Владислав Константиновин тәвсн “Корсиканка” нертә наадн һол йовдл болв. Шин наадн фестивалин цуг мөрә шүүж авв, Новочеркасск балһсна хәләһәчнрин болн чанһ неквртә жюрин гешүдин зүрк авлв.
Шин наадн иим сән күцәмж бәрсн тускар хәләһәчнрәс медж авч болх. Новочеркасск балһснд Комиссаржевскаян нертә Тенгин театр бәәнә. Эн театрин наадд оньдин өвәрц болн соньн болна. Тегәд Новочеркасск балһсна улсиг өврүлхд күнд болна. Болв Хальмгин драмин болн шог наадна театрин Иржи Губачин бичсн “Корсиканка” нертә наад хәләсн хөөн эдн икәр байрлад, буульв.
Новочеркасск балһсна бәәрн күүкд күн Алла Агееван келсәр, Элстин театр йир икәр таасгдв. Шегловин наадн зүрк авлв. Арлын губернаториг нааджана. Эврәннь нәәж күүктә ирәд хәләхлә эврәннь дурта ратистан үзввдн. Иим хааныг наадсн йир таасгдна.
Әрәсән ачта артист, “Актер России 201З” нер зүүсн Александр шегловиг фестиваль хәләсн улс яһж тоссна тускар онц келх кергтә. Залу лусин хамгин сән дүр наадсн шишлнг мөрә шүүж авсн деерән, жюрин ахлач Адель Ветрован селвгәр “Солнечный зайчик” нер зүүв.
Хәләһәчнрин, фестивалин бүрдәһәчнрин болн жюрин гешүдин тоолврар Хальмгин театрин художественн һардач, ах режиссер Владислав Константиновин тәвсн “Корсиканка” наадн цуг халхаснь хамгин сән гиж тоолгдв.
Наполеона сүл дурна туужиг Хальмгин театр нәрн болн ке-сәәхн кевәр үзүләд, олн улсин зүрк авлв. Эдн наадыг йир сәәнәр тосж, кесгтән альхан ташв. Дамлтта жюрин гешүд наад тәвсн режиссерин көдлмшиг өөдәнәр үнләд, император Наполеона дүриг чик кевәр үзүлсиг онц темдглв.
Ирина Горяшкиеван келсәр, тетарин директор Полина Комышева Францд сурсн цагт Наполеона тускар бәәрн улс ямаран тоолврта бәәхинь медж. Францин улс энүг келн-улсин баатр гиж тоолхш. Зуг наад хәләхлә, тал талдан дүр үзгдв. Иим күүг күндлх дурн күнрә наад хәләснә хөөн.
Тер мет Хальмгин театрин үзлсн наадн “Лучшая сценография” номинацд бас диилвр бәрв. Эн мөрәг Әрәсән болн хальмг танһчин искусствин ачта үүлдәч Валерий Яшкуловд бәрүлж өгв. Дәкәд болхла Таганрог балһсна театр Достоевскийн бичсн “Дядюшкин сон” нертә түүкәр тәвсн “Последняя гастроль князя К” нертә наадн бас гран-при шүүж авв. Жюрин гешүдин келсәр, Хальмгин тетарин иим ик күцәмж бәсрнд һардачин ик тәвц бәәнә, коллектвд үүдәгч бүлән таал тогтв.
Келхд мана танһчин артистнр иим фестивальд хойрдад орлцжана. Кесг жил хооран Леонид Филатовин бичсн “Про Федота стрельца” наадн бас иим ик сән күцәмж бәрсн билә. Тиигхд хәләһәчнр болн шалһанчр Элстин театриг тодлв. Ода Новочеркасск балсһна әмтн хальмгин хотл балһснд одад, театрин болн режиссерин көдлмшлә өөрхн таньлдх саната. Эн өдрмүдт театр шин наад белджәнә. Эн наадар эдн эн жилин театральн шин сезо секх зурата.
Хавтхна Элла, Котина Валерий
