Сурһульчнр һарин чидлән сөрцхәв

Элст балһснд сурһульчнр дунд армспортын түрүн марһан болв. Энүнд тәвн сурһульч орлцв. Эдн жирн тавн килограммас гиигн болн жирн тавн килограммас күнд чиннүрин категорьт дииләчән йилһв.

Марһана өмн көвүд зарһчнрин невриг оньган өгч сонсжана. Кемр бичкн эндү һарһхла шүүгдх әәмшг бәәнә. Марһана иим чанһ неквр орлцачнр эрк биш күцәх зөвтә. Арвн зурһан наста Мергн Шалхаков амр биш дөрлдәнд түрүн диилвр бәрсн улсин тоод йовна. Энүнә келсәр, һарин чидлән сөрдг марһан шин спорт болжана, тер бийнь цаарандан чигн иим спортар көдлх ик дурн бәәнә. Армспортын марһана орлцач Мергн Шалхаковин келсәр, эврәннь чидлдән иткәд, эрк биш диилвр бәрх күцл тәвж. Чидлтә көвүдлә ноолдх саам учрв. Тер бийнь түрүн орм эзлв. Һарин чидлән сөрхин төлә чик эв-арһ олзлх кергтә.

Марһанд орлцсн көвүдин ик зунь иим спортар икәр соньмсад, иргчдән дурта эрдмән хайх сана нуга. Эднә тоолврар, армрестлинг спортан күн болһн көдлж чадх. Энүнд ик мөнгн керг уга. Иим спорт олнд таасгдна. Армспортыг эмтн дурлж хәләнә. Энтн хамгин демократичн спорт болжана. Марһанд күн болһн орлцж чадх. Энүнә төлә шишлнг белдвр керг уга.

Эн саамд марһанд хойр девснгәр болв. Спортсменмүд барун болн зүн һарин чидлән сөрв. Зарһчнр онц марһана аш диглв, командн дөрлдәнә дииләчиг йилһв. Элст балһсна администрацин спортын, туризмин болн баһчудын кергүдин комитетин ахлач Жан Бакугиновин келсәр, армспортд шишлнг эрдм керг уга. Ода сурһульч болһн һарин чидлән сөрнә. Школд сурчасн кемд көвүд һарин чидлән оньдин сөрдг бәәсмн, хамгин чидлтәһән йилһж авдг биләвидн.

Дөрлдәнд орлцсн көвүдәс зәрмнь армрестлинг спортыг дурта эрдм гиж шүүж авх. Иим спорт дорас өсж йовх баһчудт эрүл-дорул кевәр бәәлһнд сән нилчән күргдгнь лавта.

Ээнән Делгр, Котина Валерий