Эн жил царцаха олра тархагдх әәмшг бәәнә

Эн жилин үвләр тенгрин бәәдл дару-дарунь сольгдад бәәнә. Россельхозцутхлнгин специалистнрин тоолврар, иим таал тәрәнд ик хорлтан күрдг царцахад сән болна. Дулан үвләр эдн мана танһчин тәрәнә аһуд эртәр тархагдж, тәрәнд ик хорлтан күргх әәмшг бәәнә. Иим ашлвр Россельхозцутхлнгин региональн филиалын специалистнр кев. Эднә тааврар, эн жил царцаха далн минһн гектарин аһуд тархагдх. Хар Һазра районд әәмшгтә хортна шин зүсн мароккск царцаха һарч ирв. Иим царцаха талдан хортнас эрт апрелин чилгчәр май сарин эклцәр күүклнә. Россельхозцутхлнгин Хальмгин филиалын һардач Александр Кекешкеевин келсәр, царцахан то өслһнд дулан үвл сән нилчән күргнә. Давсн жиллә әдл хавр эрт эклхлә, апрель сард һан-халун болхла царцаха эрт күүклх. Давсн жилд эн хортнла ноолдан сәәнәр кегдв. Нидн жил шишлнг отряд бүрдәгдв. Эн жил бас иим ирлцнһү керг-үүлдврмүд оданас авн күцәх кергтә. Давсн жилд мана танһчд тәвн долан минһн гектарин аһуд хорн цацгдв, тер тоод хөрн хойр минһн гектарт царцаха самолетар хорлгдв.