Хальмгин бичкн боксермуд сән үзмж бәрв
Хальмгин спортсменмүд нүүрт һарв. Ставропольск крайд көвүд дунд боксин марһан болв. Энүнд Элстин боксин школын сурһульчнр призермудын тоод орв. Марһана хамгин бичкн боксер Арлтан Очиров болхла түрүн орм эзлв. Дөрлдәнд хойр зун уйн наста спортсмен орлцв.
Ставропольск крайин Предгорненск района толһачин боксин кубокин марһанд Әрәсән Өмн үзгин хойр зун уйн наста спортсмен дииләчән йилһв. Хальмг танһчас энүнд Әрәсән ачта тренер Дмитрий Долдуновин арвн сурһульч орцлад, мана танһчин нер харсв. Эдн цугтан ачлвр шүүж авв. Хальмгин боксермуд йисн цаһан мөнгн медаль шүүж авч чадв. Дөрлдәнә хамгин бичкн боксер зурһан наста Арлтан Очиров болхла алтн медаляр ачлгдв. Тер мет энүнд “За волю к победе” и “Бесстрашие на ринге” нертә шишлнг мөрә бәрүлж өгв. Бичкн хальмгин боксермг "Хальмгин Тайсон" гиж өкәрләд келдг болв. Боксин марһана дииләч Арлтан Очировин келсәр, эцкнь груш болн перчатк хулдж өгсн бәәж. Зурһан настадан боксин секцд ирв. Түрүн марһанд орлцх дурн билә. Тенд алтн медаль шүүж авв.
Иим ик чинртә марһанд хальмгин уйн наста спортсменмүд түрүн болж орлцжана. Тер бийнь эдн әәлго-эмәлго, үүмән угаһар дөрлдв. Дөрлдәнд бичкдүд бүкл жилдән белдвр кев. Женя Котов, Артур Доржинов, Алдр Джальджиреев болн талдан чигн көвүд иим дөрлдәнд орлцад, түрүн дамшлт хоршав. Алдр Джальджиреевин аавнь Виктор Паскеновин келсәр, хальмгин бичкн боксермуд таасгдв. Хамгин икәр Арлтан Очиров таасгдв. Бичкн көвүн баатр-зөрмг кевәр ноолдв.
Давсн марһан көвүдин санлд ик удандан төөнрж үлдхнь лавта. Иим марһанд бичкн спортсменмүд дамшлт хоршаһад, урмд авна. Нег үлү, эднә тренер Дмитрий Долдуновин келсәр, дөрлдәнә ашт хальмгин спортсменмүд сән үзмж бәрв. Әрәсән ачта тренер Дмитрий Долдуновин келсәр, бичкн спортсменмүд дигтә-дарата болх зөвтә, цаглань өрүн босад, цогц-махмудан батрулхла чанһ чиирг болх.
Хальмг танһчин спортын, туризмин болн баһчудын политикин министр Александр Гедеримин келсәр, ода мана танһчд бокс болн бөк бәрлдлһнә спортын делгрлтд ик оньг тусхагджана. Танһчин спортын, туризмин болн баһчудын политикин министр Александр Гедерим келсәр, мана танһчд бюджетн учрежденьст бәәх спортын залмуд олзлсн деерән, иим арһ бас олзлх кергтә. Энд көвүдт цуг таал бүрдәгдв. Шин гер, дамшлтта тренермуд бәәнә. Цуг эн таалыг хальмгин спорт делгрүлһнд олзлхла сән болх.
Удл уга хальмгин бичкн боксермуд дарани марһанд орлцх. Тренер Дмитрий Долдуновин келсәр, ода көвүд сән белдвр кеһәд, дигтә-даратаһар көдләд, тренерин цуг селвгүдиг күцәхлә, сән үзмж ирх.
Бевина Мергн, Бадмаран Владислав
