Школьн театрмудын марһан болв
“На подмостках апреля”. Иим нерәдлһтә школьн театрмудын марһан хәләвр Элст балһснд болв. Иим искусствин фестиваль дорас өсж йовх баһчудын үүдәгч билгинь делгрүлх күцл тәвж бүрдәгднә.
Нааран ирсн бичкдүд хоосн хәләһәчнр биш, эдн бас наадна орлцач болжана. Элст балһсна долан эрд-сурһулин учрежденя сурһульчнр эврәннь белдсн театральн наадан үзүлв. Марһана иим һол төр шүүж авснь бас учрта. Туульмудар дамжулад үйәс үй күртл келн-улсин цецн ухан күргж медүлгднә. Элст балһсна администрацин эрдм-сурһулин заллтин әнгин ахлач Наталья Бютцинован келсәр, Әрәсән келн-улсин туульмудт цаһан седклтәһәр бәәлһнә, үнн-чик кевәр бәәж, нег-негән күндлж, өршәнһү седкл зүүж нег-негндән дөн күргхин тускар келгднә. Эннь цугтан оюни шагшавдын чинр болжана. иим сән сурһмж дорас өсж йовх баһчудт өгх кергтә.
Театр гисн йоста күчтә чидл. Энүнд цуг искусств негдәд, иим күч өгчәнә. Иим чинртәһәр уйн наста артистнрин марһан бүрдәж давулгдв. Онц темдглхд, бичкдүдин төлә иим керг-үүлдвр сүл аврн тавн жил дарандан бүрдәж давулгдна. Энүг хотл балһсна администрацин эрдм-сурһулин заллт болн бичкдүдин үүдәлтин бәәшнг бүрдәнә. Бичкдүдин үүдәлтин бәәшнгин директор Людмила Чурбанован келсәр, дорас өсж йовых бичкдүдт килмж өгч, эднә иргчин тускар ухалж көдлх күцл улсин хамгин һол керг болжана.
Бичкдүдин үүдәлтин бәәшнгин директор Людмила Чурбанован келсәр, школмуд болн театральн студьс драматическ искусствиг сәәнәр тархажана. Энүнд нертә артистнр Александр Алексеевич Шегловиг болн Зоя Нюкеевна Хонхолджиноваг онц темдглх кергтә. Иим багшнр бичкдүдт йир дурта, театральн эрдм бичкдүдт дасхжана. Бичкдүдин сурһмж театрар болн хамгин сән гисн драматическ үүдәврмүдәр дамжулж өггднә.
Эн жил олн коллективмуд фестивальн программд түрүн болж орлцжана. Кесг жилдән иим марһанд орлцжах бчикдүдин коллективмуд бас бәәнә. Эднә тоод "Лицей" нертә театральн студь. Энүг Хальмг танһчин ачта артистк Зоя Хонхолджинова һарджана. Нертә артистк йоста үүдәгч күн, бичкдүдин төлә шин наад тәвхәр зүткнә. Эн саамд Зоя Хонхолджинова болн энүнә сурһульчнр Цаһан болн Ноһан Дәркин туск домг нертә хальмг улсин туульсар тәвсн наад үзүлв.
Лицей нертә театральн студин һардач Зоя Хонхолджинован келсәр, фестиваль йир таасгдна. Жил болһн орлцнавидн. Хөрн негдгч зун жилмүд итклтә болн сурһульта улсин цаг болх зөвтә. Бичкдүд мана танһчин бахмж.
Театральн кружокмудын һардачнр болн уйн наста артистнр ик көдлмш күцәв. Бичкн артистнр хәләһәчнрт хальмгин, орсин болн хасгудын туульмуд үзүлв. Аштнь “Ровесник” нертә һурвдчг школын коллектив диилвр бәрв. Эднә һардачнь Әрәсән ачта артист Александр Шеглов. Ода эдн танһчин марһанд Элст балһсна нер харсх. Марһана бүрдәһәчнрин тоолврар, иим керг-үүлдвр эрк биш кергтә. Энүнә йовудт билгтә көвүд-күүкд йилһрнә, бичкдүдин театральн шин коллектив тогталһнд сән нилчән күргжәнә.
Елена Алексенко, Настан Сергей
